नवी मुंबई: पुढची दोन वर्षे सिडकोबाधित शहरांना पाणी प्रश्नाला सामोरे जावे लागणार असल्याने टंचाई दूर करण्यासाठी 'मागणी तसा टँकर' ही योजना राबविण्यास सिडकोला पनवेल संघर्ष समितीने आज प्रवृत्त केले.

सिडको भवनमधील तिसऱ्या मजल्यावर पाणी पुरवठा विभागाचे अतिरिक्त कार्यकारी अभियंता एन. सी. बाईस यांच्या समवेत प्रदीर्घ चर्चा करून उपाय योजना राबविण्याचे ठरले.

करंजाडे, नवीन पनवेल, खांदा कॉलनी, कामोठे, कळंबोली, खारघर, तळोजे आदी शहरात पाणी टंचाईमुळे नागरिक मेटाकुटीला आले आहेत.

या संदर्भात आज सकाळी सिडको भवनमध्ये अतिरिक्त कार्यकारी अभियंता बाईस यांच्यासमवेत पनवेल संघर्ष समितीचे अध्यक्ष कांतीलाल कडू यांनी बैठक घेवून पर्यायी पाणी पुरवठा व्यवस्था करण्याची आग्रही मागणी केली. त्यास बाईस यांनी तातडीने होकार दिला.

महाराष्ट्र जीवन प्राधिकरण योजनेच्या 408 कोटीची अमृतयोजना पूर्ण होण्यास अजून तीन वर्षाचा कालावधी लागणार आहे. तोपर्यंत संबधित शहरांना पाणी प्रश्न भेडसावणार आहे. त्यावर उपाय योजना करताना मागणी तशी पाणी टँकर पुरविण्यात यावा, अशी मागणी कांतीलाल कडू यांनी केली. त्यानुसार ज्या सोसायटीत पाणी येत नसेल त्यांनी सिडको अधिकाऱ्यांकडे टँकर मागवावा. जर टँकर मिळत नसेल तर लेखी पत्रासह पनवेल संघर्ष समितीचे खारघर अध्यक्ष तुकाराम कंठाळे 9324358321, दीपक कांबळे  9372277363, कळंबोलीसाठी संतोषकुमार शुक्ला 9323003108, कामोठेसाठी रमेश गोवारी 9324285617, नवीन. पनवेलसाठी अभिजित पुळेकर 8104988319, तळोजासाठी 

सुनील भोईर 8369309754, नावडे-रोडपालीकरिता योगेश पगडे 9768106442 तसेच करंजाडेसाठी विजय बाविस्कर 8652578092 आदी पनवेल संघर्ष समितीच्या पदाधिकाऱ्यांशी लेखी पत्राद्वारे सोसायटी पदाधिकाऱ्यांनी संपर्क साधावा, असे आवाहन पनवेल संघर्ष समितीचे संपर्कप्रमुख भास्करराव चव्हाण यांनी केले आहे.

सिडको भवनातील चर्चेत सिडको प्रशासनाकडून मुख्य अभियंता गजानन दलाल, मुख्य सल्लागार विलास धमाले तसेच समितीच्यावतीने कांतीलाल कडू, भास्करराव चव्हाण, खारघर शहर अध्यक्ष तुकाराम कंठाळे, पनवेल शहर अध्यक्ष गणेश वाघिलकर आणि चंद्रशेखर हर्षे आदींनी भाग घेतला होता.

अधिकाऱ्यांच्या घरासमोर आंदोलनातून करणार ठणाणा!

सिडकोबाधित शहरांना यापुढे पाणी टंचाई भासल्यास संबंधीत अधिकारी राहत असलेल्या घरासमोर पनवेल संघर्ष समिती निषेध मोर्चा काढून धरणे आंदोलनाद्वारे अधिकाऱ्यांच्या नावाने ठणाणा करेल, असा लेखी इशारा निवेदनातून दिला. अधीक्षक अभियंता प्राणिक मुल यांच्या नावाने कडक शब्दांतील निवेदन दिले आहे. प्रकृती ठिक नसल्याने ते उपस्थित नव्हते. त्यांच्या ऐवजी बाईस यांनी सहकार्य केले.