रोहित शर्माने काढले विंडीजचे दिवाळे; भारताची मालिकेत विजयी आघाडी
- by Adarsh Maharashtra
- Nov 06, 2018
- 772 views
लखनऊ : कर्णधार रोहित शर्माच्या नाबाद १११ धावांच्या खेळीच्या जोरावर भारताने वेस्ट इंडिजवर दुसऱ्या टी-२० लढतीत ७१ धावांनी मात केली असून ३ सामन्यांच्या मालिकेत २-० अशी विजयी आघाडी घेतली आहे. भारताने निर्धारित २० षटकांत २ बाद १९५ धावा केल्या होत्या. भारताने दिलेल्या १९६ धावांच्या आव्हानाचा पाठलाग करताना विंडीजचा संघ २० षटकांत ९ बाद १२४ धावांपर्यंतच मजल मारू शकला. भुवनेश्वर कुमार, खलिल अहमद, जसप्रीत बुमराह आणि कुलदीप यादव यांनी प्रत्येकी दोन बळी टिपत विंडीजला जखडून ठेवले. विंडीजला दुसऱ्याच षटकात शेई होपच्या रूपाने पहिला झटका बसला आणि त्यानंतर ठराविक अंतराने गडी बाद होत गेले. विंडीजकडून डॅरेन ब्राव्होने सर्वाधिक २३ धावांची खेळी केली. त्याआधी नाणेफेक जिंकून पाहुण्या विंडीजने भारताला प्रथम फलंदाजीसाठी पाचारण केले. हा निर्णय भारताच्या चांगलाच पथ्यावर पडला. रोहित शर्मा आणि शिखर धवन या सलामीच्या जोडीने दमदार फलंदाजी करत भारताला १२३ धावांची सलामी मिळवून दिली. शिखर वैयक्तिक ४३ धावांवर बाद झाला. पाठोपाठ ऋषभ पंतही ५ धावा करून तंबूत परतला. मात्र, त्यानंतर रोहित आणि लोकेश राहुलने तुफानी फलंदाजी करत भारताची धावसंख्या १९५ पर्यंत नेली. रोहितने ६९ चेंडूत ९ चौकार आणि ७ उत्तुंग षटकारांनिशी १११ धावा केल्या.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम