बदलापूर (प्रतिनिधी) : दिवसेंदिवस वाढत जाणाऱ्या कोरोना रुग्णांची संख्या लक्षात घेऊन हि साखळी तोडण्यासाठी आणि शहर सुरक्षित ठेवण्यासाठी बदलापूर शहरात नगर परिषदेमार्फत घरोघरी जाऊन चाचणी करण्याची मोहीम हाती घेण्यात आली आहे. या मोहिमेला शहरातील सर्वानी सक्रिय सहकार्य करावे, असे आवाहन उपविभागीय अधिकारी तथा
कुळगाव बदलापूर नगर परिषदेचे प्रशासक जगतसिंग गिरासे यांनी केले आहे. 
     कुळगाव बदलापूर नगर परिषदेच्या खाते प्रमुखांची बैठक जगतसिंग गिरासे यांच्या अध्यक्षतेखाली पार पडली. त्यावेळी या योजनेची सविस्तर माहिती जगतसिंग गिरासे यांनी अधिकाऱ्यांना समजावून सांगितली. मुख्याधिकारी दीपक पुजारी, जयेश भैरव, डॉ. राजेश अंकुश, डॉ. हरेश पाटोळे, राजेंद्र बोरकर, प्रवीण वडगाये, दशरथ राठोड, किरण गवळे, सुरेंद्र उईके, सिद्धार्थ पवार, विलास मुठे, प्रतीक्षा सावंत आदी अधिकारी उपस्थित होते. दहा दिवसांची हि विशेष मोहीम असेल. यात दोन सदस्यांची एक टीम अशा शंभर टीम तयार करण्यात येतील असे प्रशासक जगतसिंग गिरासे यांनी सांगितले. या टीमच्या सदस्यांना थर्मामीटर पासून सर्व साहित्य पुरविण्यात येईल. प्रत्येक टीम सदस्यांनी रोज ९० घरांमध्ये जाऊन तपासणी करायची आहे. घरोघरी जाऊन तपासणी झाल्यावर त्याचा अहवाल टीम सदस्यांनी आपल्या वरिष्ठांना सादर करायचा आहे. सर्व अधिकाऱ्यांनी एकमेकांशी समन्वय ठेऊन याची माहिती घ्यायची आहे. कोणाला काहीही अडचण आल्यास किंवा आणखी काही समस्या निर्माण झाल्यास थेट मुख्याधिकारी अथवा आपल्याशी संपर्क साधावा, असेही जगतसिंग गिरासे यांनी सांगितले. या टीम मध्ये बहुतांशी शहरातील शिक्षकांची निवड करण्यात आली आहे. या शिक्षकांना पगार मिळतो. मात्र या विशेष मोहीम राबविताना त्यांना विशेष प्रोत्साहन भत्ता देण्याचा आपला प्रस्ताव असल्याचे जगतसिंग गिरासे यांनी सांगितले.
    शहरातील सर्व आजी माजी लोकप्रतिनधी, राजकीय पक्षांचे पदाधिकारी कार्यकर्ते, सामाजिक शैक्षणिक संघटनांचे पदाधिकारी सदस्य आणि सर्व नागरिकांनी या टीम सदस्यांना सहकार्य करायचे आहे. या टीम सदस्यांना पालिकेचे ओळख पत्र देण्यात आले असल्याने नागरिकांनीही या सदस्यांना सर्व माहिती देऊन सहकार्य करावे असे आवाहन प्रशासक जगतसिंग गिरासे यांनी केले आहे.