नवी मुंबई : पारिजात मुंबई व अभिनयधारा कला संस्था या संस्थेच्यावतीने आंतरराष्ट्रीय एकपात्री स्पर्धेत नवी मुंबईच्या हितार्थ पाटील या बालकलाकाराने प्रथम क्रमांक पटकावत बाजी मारली. अत्यंत चुरशीच्या अशा स्पर्धेत हितार्थने आपल्या उत्कृष्ट सादरीकरणाने सर्वांची माने जिंकली.

पारिजात मुंबई व अभिनयधारा कला संस्था या संस्थेच्यावतीने बालकलाकरांसाठी आंतरराष्ट्रीय Lockdown Online एकपात्री सादरीकरण स्पर्धा आयोजित करण्यात आली होती. या स्पर्धेला खूप मोठ्या प्रमाणात प्रतिसाद मिळाला भारतातूनच नव्हे तर अमेरिका, नेदरलँड, ब्रिटन, दुबई, अबुदाबी येथून नऊशेच्यावर बालकलाकारांनी सहभाग नोंदविला. यामध्ये अ व ब गटामध्ये प्रत्येकी २५ असे स्पर्धक अंतिम फेरीसाठी निवडले गेले. यामध्ये ब गटात जी ११ ते १६ वर्षे वयोगटाकरीता त्यामध्ये खूप चुरसीच्या स्पर्धेत नवी मुंबईच्या हितार्थ पाटील या बालकलाकाराचा प्रथम क्रमांक आला.

सुप्रसिद्ध अभिनेता सुमीत राघवन यांनी निकाल घोषित केला. या स्पर्धेचे परीक्षक सर्वांचा लाडका अभिनेता सुबोध भावे व अभिनेत्री चिन्मयी सुमीत आहेत. ही स्पर्धा जिंकल्यावर हितार्थने आनंद व्यक्त करीत श्रेय आपल्या आई-वडिलांना दिले ज्यांनी त्या अभिनयाकरीता नेहमी प्रोत्साहन दिले आहे. विशेष म्हणजे या स्पर्धेत सादर केलेल्या एकपात्रीची संहिता त्याचे वडील उपदेश पाटील यांनी लिहिली आहे. हितार्थ वयाच्या सहाव्या वर्षापासून अभिनय करीत आहे. बालनाट्याच्या माध्यमातून रंगभुमीवर विविध गाजलेल्या नाटकात त्याने आपली छाप सोडली आहे. छोट्या पडद्यावर हितार्थने अनेक मालिकांमध्ये प्रमुख भुमिका साकारत प्रेक्षकांची मने जिंकलीत.

हिंदीत कलर्स टिव्हीवरील ‘कोड रेड’, सोनी टिव्हीवरील ‘मन मे है विश्वास’, ‘क्राईम पेट्रोल’, ‘हासील’ व झी टिव्हीवरील ‘काला टिका’, याचबरोबर ‘एक विवाह ऐसा भी’, दूरदर्शनवरील ‘दो सौ करोड कि बोटल’, मराठीमध्ये ‘नकळत सारे घडले’, ‘संत ज्ञानेश्वर’, ‘विठ्ठू माऊली’, ‘गणपती बाप्पा मोरया’, ‘तू माझा सांगाती’मध्ये संत ज्ञानेश्वरांची भूमिका, ‘लक्ष्य’, ‘गोठ’, ‘बाळू मामाच्या नावानं चांग भलं’ व कित्येक लघूपटात त्याच्या प्रमुख भूमिका आहेत. उत्तम नृत्याबरोबर तो गायन तर करतोच तसेच फॅशन शोमध्ये मॉडेल्ससमवेत रॅम्प वॉल्कही करतो. गेली एक वर्षे हितार्थ स्टेज शोमध्ये व व्यावसायिक रंगमंचावर निवेदनसुद्धा करीत आहे.