नवी मुंबई (प्रतिनिधी) : महाविद्यालयीन तरुणाची दिशाभूल करून त्याच्याजवळचा मोबाइल फोन लुबाडून नेल्याची घटना शनिवारी सकाळी पनवेलमधील करंजाडे येथे घडली. पनवेल शहर पोलिसांनी दोघा अज्ञात भामट्यांविरोधात फसवणुकीचा गुन्हा दाखल करून त्यांचा शोध सुरू केला आहे.

या घटनेतील महाविद्यालयीन विद्यार्थी करंजाडे येथे राहण्यास आहे. सध्या तो अकरावीत शिक्षण घेत आहे. शनिवारी सकाळी सव्वासात वाजण्याच्या सुमारास हा विद्यार्थी नेहमीप्रमाणे आपल्या महाविद्यालयात पायी जात होता. यावेळी तो वडघर खाडीपुलावर आला असताना, अज्ञात व्यक्तीने त्याच्याशी बोलण्याचा बहाणा करून अप्पो मोबाइलच्या दुकानाबाबत विचारणा केली. यावर विद्यार्थ्याने इतक्या सकाळी दुकान उघडे नसल्याचे सांगत असतानाच त्याच्याकडे असलेल्या रेडमी नोट-७प्रो या मोबाइलवर फोन आला. त्यामुळे तो फोनवर बोलत असताना, त्याच्या हातातून मोबाइल खाली पडला. हा फोन अज्ञात व्यक्तीने उचलून काळ्या रंगाच्या पाकिटात टाकून आपल्या खिशात ठेवला. विद्यार्थ्याने फोन आपला असल्याचे सांगितल्यानंतर अज्ञात व्यक्तीने काळ्या रंगाचे पाकीट विद्यार्थ्याच्या खिशात ठेवून आपल्या सहकाऱ्यासह मोटारसायकलवरून पलायन केले. त्यानंतर विद्यार्थ्याने मोबाइल फोन तपासला असता, काळ्या रंगाच्या पाकिटात मोबाइलच्या आकाराची काच दिसून आली. विद्यार्थ्याने याबाबत पनवेल शहर पोलिस ठाण्यात तक्रार दाखल केली.