नवी दिल्ली :-देशात करोना संक्रमणाचं सर्वाधिक प्रमाण आढळलंय ते महाराष्ट्रात... देशातील ३६ टक्क्यांहून अधिक करोना संक्रमणाचे रुग्ण केवळ महाराष्ट्रात आढळले आहेत. महाराष्ट्रात शिवसेना व राष्ट्रवादी काँग्रेस आणि काँग्रेस यांच्या 'महाविकास आघाडी'चं सरकार आहे. मुख्यमंत्री उद्धव ठाकरेंच्या नेतृत्वाखाली सरकार सध्या करोना संक्रमणावर नियंत्रण मिळवण्याचा प्रयत्न करत आहे.

करोनाच्या पार्श्वभूमीवर राज्यात राजकारणालाही ऊत चढलाय. मंगळवारी, राष्ट्रवादीचे अध्यक्ष शरद पवार यांनी उद्धव ठाकरेंची भेट घेतली. तर दुसरीकडे, काँग्रेसकडून राहुल गांधी यांनी बोलताना, महाराष्ट्रात काँग्रेस पक्ष सरकारसोबत असलं तरी 'डिसिजन मेकर' नसल्याचं म्हटलंय.मंगळवारी एका पत्रकार परिषदेत बोलताना, महाराष्ट्रातील महाविकास आघाडीच्या एकजुटतेवरच राहुल गांधी यांनी प्रश्नचिन्ह उपस्थित केले आहेत. महाराष्ट्र सरकार काँग्रेस सहकार्य करत आहे पण राज्यात काँग्रेस निर्णायक भूमिकेत नसल्याचं म्हणत राहुल गांधी यांनी हतबलता व्यक्त केली. पंजाब, छत्तीसगड, राजस्थान, पुदुच्चेरीमध्ये मात्र काँग्रेस निर्णायक भूमिकेत असल्याचं त्यांनी म्हटलंय. सरकार चालवण्यात आणि सरकारला पाठिंबा देण्यात फरक असतो, असंही त्यांनी यावेळी म्हटलंय. महाराष्ट्र आर्थिक केंद्रबिंदू असल्यानं केंद्र सरकारनं संपूर्ण मदत करायला हवं, असंही राहुल गांधी यांनी यावेळी म्हटलंय.राहुल गांधींचं हे वक्तव्य सावरताना महाराष्ट्र काँग्रेस अध्यक्ष आणि मंत्री बाळासाहेब थोरात यांनी 'काँग्रेस नाखूश नाही... प्रत्येक आठवड्याला होणाऱ्या बैठकीत तीनही पक्षांचे नेते हजर असतात. तेच निर्णय घेतात. सर्व पक्ष मिळून काम करत आहेत' असंही त्यांनी म्हटलंय.तर दुसरीकडे, काँग्रेस नेते राहुल गांधी असं म्हणून राज्याची जबाबदारी झटकू शकत नाहीत, असं म्हणत विरोधी पक्षनेते देवेंद्र फडणवीस यांनी त्यांच्यावर टीका केलीय.