नवी दिल्ली - सर्व महाराष्ट्राचे लक्ष असलेल्या विधानसभेच्या निवडणुकीच्या तारखांची घोषणा निवडणूक आयोगाने आज पत्रकार परिषद घेऊन केली. महाराष्ट्रासह हरियाणा विधानसभा निवडणूक एकाच टप्प्यात घेतली जाणार आहे. २१ ऑक्टोबरला मतदान होणार असून २४ तारखेला निकाल जाहीर केले जातील. निवडणुकीची ही संपूर्ण प्रक्रिया दिवाळीपूर्वीच पूर्ण केली जाणार आहे.
मुख्य निवडणूक आयुक्तांनी सांगितल्याप्रमाणे, १ सप्टेंबर रोजी निवडणुकीच्या तारखांसाठी सुरक्षितता आणि इतर गोष्टींचा आढावा घेतला. तसेच दोन्ही राज्यांमध्ये निःपक्षपातीपणे निवडणुका होण्याची खात्री करून घेतली. दोन्ही राज्यांमध्ये पारदर्शक मतदानासाठी निवडणूक आयोगाने पूर्व तयारी केली आहे. यासाठी प्रत्येक ठिकाणी जाऊन निवडणूक अधिकाऱ्यांनी तपास केला. महाराष्ट्रात ८ कोटी ९४ लाख मतदार आहेत. महाराष्ट्र विधानसभेचा कार्यकाळ ९ नोव्हेंबर तर हरियाणा विधानसभेचा कार्यकाळ २ नोव्हेंबरला संपुष्टात येत आहे. निवडणुकीच्या तारखांची घोषणा झाल्यानंतर दोन्ही राज्यांमध्ये २४ तास पोलिस बंदोबस्त लावला जाईल असेही आयोगाने स्पष्ट केले.
निवडणूक अर्जाच्यावेळी गुन्ह्याची माहिती देणे बंधनकारक करण्यात आले आहे. सोशल मीडियावर निवडणूक आयोगाची करडी नरज असणार आहे. तसेच या निवडणुकीत पैशाचा गैरवापर टाळण्यासाठी खास खबरदारी घेण्यात आली असून तशी पथके स्थापन करण्यात आली आहेत. नक्षल भागातील गडचिरोली, गोंदियात विशेष सुरक्षा व्यवस्था असेल, असे मुख्य निवडणूक आयुक्त सुनील अरोरा यांनी यावेळी स्पष्ट केले. आणि निवडणूक आयुक्त सुनील अरोरा यांनी निवडणुकीत सर्वच राजकीय पक्षांना प्लास्टिक बंदीचे आवाहन केले आहे. प्रचार सामुग्रीत त्यांनी प्लास्टिकचा वापर टाळावा. तसेच पर्यावरणपूरक अशा निवडणूक पार पाडण्यात सहकार्य करावे अशी विनंती करण्यात आली आहे.

दोन्ही राज्यांतील निवडणुकीच्या तारखा:-

* २७ सप्टेंबर रोजी नोटिफिकेशन होणार जारी.

* ४ ऑक्टोबरपर्यंत इच्छुकांना उमेदवारी अर्ज दाखल .

* ५ तारखेला इच्छुक उमेदवारांच्या अर्जांची तपासणी .

* ७  ऑक्टोबरपर्यंत उमेदवारी अर्ज मागे घेता येईल.

* २१  ऑक्टोबर रोजी दोन्ही राज्यांमध्ये एकाच टप्प्यात मतदान .

* २४  ऑकटोबरला मतमोजणी आणि निकाल .