सध्या संपूर्ण जगात कोरोनानं हाहाकार माजविला असताना भारताचा आकडाही झपाट्यानं वाढत चाललाय. त्यातही मुंबईची वाढती संख्या तर अत्यंत धक्कादायक. त्यामुळे जनतेच्या मदतीसाठी महाराष्ट्रातील अनेक 'एस.आर.पी.' कंपन्या तातडीनं बोलावून घेण्यात आलेल्या. सोलापूर 'एस.आर.पी. कॅम्प' मधील एक तुकडीही 'कोरोना वॉरियर्स' म्हणून मुंबईत दाखल झालीय. मात्र गेल्या दोन-तीन दिवसांपासून या सोलापूरच्या शंभर जवानांची अवस्था इतकी बिकट झालीय की त्यांना रस्त्यावरच्या फुटपाथवरच कशीबशी वळकटी पसरून झोपावं लागतंय. अनेकजण तर अंगावरच्या खाकी ड्रेसनिशीच फूटपाथवर झोपण्याचा केविलवाणा प्रयत्न करताहेत. मुंबई पोलीस आयुक्तालय ऑफिससमोरील रस्त्यावर हा बाका प्रसंग केवळ कोरोनाच्या भीतीपोटी 'एस.आर.पी.' जवानांवर ओढविला गेलाय.

गृह विभागाच्या आदेशानुसार शंभर जवानांची एक कंपनी मंगळवारी रात्री मुंबईकडे निघाली. बुधवारी सकाळी पोहोचल्यानंतर त्यांनी रिपोर्ट सादर केला, मात्र 'तुम्ही खूप उशीर केलात,' असं एका पोलिस अधिकाऱ्यानं अत्यंत तटस्थपणे त्यांना सांगितलं. ना कुठे त्यांना बंदोबस्ताचा पॉईंट दिला की राहण्याची-जेवणाची सोय केली. 'कोरोनाच्या काळात केवळ शंभर जवान बाहेरून आले आहेत,' या भीतीपोटी कोणत्या वस्तूलाही हात लावू दिला गेला नाही. गेल्या दोन दिवसांपासून शौचालयासाठीही या जवानांची भटकंती सुरू झालीय. घरातून निघताना त्यांनी डबे बांधून घेतले होते, त्याच डब्यातील तुकडा-अर्धा तुकडा खाऊन गेले तीन दिवस हे जवान वेळ मारून नेताहेत. सध्या मुंबईतलं लॉकडाऊन अत्यंत कडक केल्यामुळे बाहेरही कुठे खाण्यास मिळत नाही. सकाळी फक्त भाजीवाल्याकडून स्वतःच्याच पैशानं भाजी घेऊन तीही कच्ची खाल्ली जातेय. पिण्याच्या पाण्यासाठीही या जवानांना वणवण फिरावं लागतंय.

अशातच मुख्यमंत्री उद्धव ठाकरे यांच्या 'मातोश्री' बंगल्यावर बंदोबस्तासाठी असलेल्या सोलापूरच्या आठ 'एस.आर.पी.' जवानांना कोरोनाची लागण झाल्याचं वृत्त सर्वत्र पसरल्यामुळे या फुटपाथवरील जवानांबरोबरही अनेकांचं वागणं तत्काळ बदललंय आता सांगा तुम्हीच..कसं लढणार हे 'कोरोना वॉरियर्स' ?