कोलकाता - केंद्रातील नरेंद्र मोदी सरकार आणि प. बंगालच्या मुख्यमंत्री ममता बॅनर्जी यांच्यातील तणावामुळे रविवारी रात्री कोलकात्यात घटनात्मक पेचासारखी परिस्थिती निर्माण झाली. सारदा व रोझ व्हॅली चिटफंड घोटाळा प्रकरणी कोलकात्याचे पोलिस आयुक्त राजीव कुमार यांच्या चौकशीसाठी दाखल झालेल्या सीबीआयच्या ४० अधिकाऱ्यांना सायंकाळी पोलिसांनी ताब्यात घेत जीपमध्ये कोंबले. नंतर ठाण्यात तीन तास ताटकळत ठेवले. तणाव वाढल्यावर रात्री उशिरा या भागात केंद्रीय राखीव दल तैनात करण्यात आले. दुसरीकडे सीबीआय कार्यालयावर पोलिसांनी ताबा घेतला. पोलिसांना सीबीआय अधिकाऱ्यांना ताब्यात घेण्याचे अधिकार आहेत की नाहीत, यावरून राज्यात घटनात्मक पेच निर्माण झाला.

गेल्या वर्षी १६ नोव्हेंबरला प. बंगालने दिल्ली पोलिस एस्टॅब्लिशमेंट कायद्यानुसार सीबीआयला राज्यात चौकशीसाठी दिलेली सहमती मागे घेतली होती. त्यामुळे आता राज्यात सीबीआयला थेट कारवाई करण्याचे अधिकार नाहीत. यासाठी राज्य सरकारची परवानगी घेणे आवश्यक आहे.

हा तर सत्ता उलथवून टाकण्याचा कट : ममता बॅनर्जी

प. बंगाल पोलिसांनी सीबीआय पथकातील अधिकाऱ्यांना असे पकडून जीपमध्ये कोंबले आणि ठाण्यात तीन तास डांबून ठेवले. मुख्यमंत्री ममता बॅनर्जी यांनी पंतप्रधान मोदी व अमित शहा यांचा राज्यातील तृणमूलची सत्ता उलथवण्याचा हा डाव असल्याचे सांगत केंद्र व सीबीआयच्या निषेधार्थ धरणे धरले.