'जिंगल बेल, जिंगल बेल; जिंगल ऑल दि वे' या गाण्यासह मंजूळ घंटानाद करत, बच्चे कंपनीला 'गिफ्ट्स' देत आनंद वाटणारा आणि सर्वानाचा हवाहवासा वाटणारा सांताक्लॉज; आपल्या मुंबईत रात्रीच नव्हे तर दिवसा आणि एक किंवा दोन नव्हे तर चक्क सहा दिवस अवतरला आहे ! यावेळेस महापालिकेच्या 'एन'विभागाच्या विनंतीनुसार अवतरलेला आपला लाडका सांताक्लॉज नेहमीपेक्षा थोडा वेगळा संदेश घेऊन मुंबईकरांशी संवाद साधत आहे. हा संदेश आहे, मुंबईच्या स्वच्छतेचा आणि साफसफाईचा ! मुंबईतील घाटकोपर, विक्रोळी परिसरात रोज सकाळी आणि संध्याकाळी गर्दीच्या ठिकाणी सांताक्लॉज आपल्याला दिसतोय, आपल्याशी बोलतोय आणि गिफ्टही देतोय. या सांताक्लॉजला भेटण्यासाठी बच्चे कंपनीमध्ये मोठा उत्साह दिसून येत आहे. २५ डिसेंबर ते ३१ डिसेंबर दरम्यान महापालिकेच्या 'एन'विभागातील गर्दीच्या ठिकाणी हे सांताक्लॉज आपल्याला भेटणार आहेत.

   स्वच्छता, आरोग्य, पर्यावरण संवर्धन इत्यादी विषयांशी संबंधित वेगवेगळे संदेश सांताक्लॉजमार्फत शालेय विद्यार्थ्यांना आणि परिसरातील नागरिकांना दिले जात आहेत. एवढेच नाही तर लहान मुलांना सांताक्लॉज स्वतःच्या हाताने एक 'गिफ्ट' देखील देत आहे. त्याचबरोबर जे नागरिक रस्त्यावर किंवा पदपथावर कचरा फेकतील त्यांना स्वच्छतेचे महत्व पटवून सांगण्यासोबतच स्वच्छतेचा संदेश असलेले एक छोटेसे 'ग्रीटींग कार्ड' देखील सांताक्लॉजच्या हातूनच 'गिफ्ट' स्वरुपात मिळत आहेत.स्वच्छतेचा संदेश देणा-या सांताक्लॉजला भेटण्यासाठी आणि त्यांच्यासोबत सेल्फी काढण्यासाठी लहानांसोबतच मोठ्यांचीही गर्दी दिसून येत आहे.

      महापालिकेच्या 'एन' विभागाने सांताक्लॉजच्या सहकार्याने राबविलेल्या नाविन्यपूर्ण उपक्रमाची दखल घेत स्वच्छतेबाबत जाणीव जागृतीसाठी महापालिकेच्या इतर विभाग कार्यालयांनी देखील या प्रकारचा अभिनव उपक्रम आपापल्या क्षेत्रात राबवावा, असे आदेश महापालिका आयुक्त श्री. अजोय मेहता यांनी दिले आहेत.

      या उपक्रमाबाबत अधिक माहिती देतांना महापालिकेच्या 'एन' विभागाच्या सहाय्यक आयुक्त श्रीमती भाग्यश्री कापसे यांनी सांगितले की, दि. २५ डिसेंबर रोजीच्या 'नाताळ' (ख्रिसमस) सणाचे आणि पुढील आठवड्यात येणाऱ्या नवीन वर्षाचे औचित्य लक्षात घेऊन स्वच्छता, आरोग्य व पर्यावरणाबाबत सांताक्लॉजच्या माध्यमातून जनजागृती करण्याचा अभिनव प्रयोग राबविण्यात येत आहे. महापालिकेचे कर्मचारी आणि स्वयंसेवी संस्थांचे स्वयंसेवक यांच्या मदतीने एन विभागातील महत्त्वाच्या ठिकाणी हा उपक्रम राबविण्यात येत आहे. या उपक्रमाला मोठ्यांचा व लहानांचा उत्साहवर्धक प्रतिसाद मिळत असल्याचेही श्रीमती भाग्यश्री कापसे यांनी आवर्जून सांगितले आहे.