मुंबई :  एकांकिका विश्वात महत्वाची समजली जाणारी तसेच हौशी आणि होतकरू कलाकारांना हक्काचं व्यासपीठ मिळवून देणारी 'मृणालताई नाट्यकरंडक' एकांकिका स्पर्धेच्या तारखा जाहीर झाल्या आहेत. एकांकिकांच्या माध्यमातून अनेक कलाकार घडले आहेत आणि घडतही आहेत, याच प्रक्रियेत आपलाही हातभार असावा म्हणून सोहम थिएटरन ही २०१७ पासून या स्पर्धेला सुरुवात केली आहे. स्पर्धेचं हे चौथे वर्ष ! कोरोना महामारीमुळे झालेल्या लॉकडाऊनच्या काळात २ वर्षे नाट्यगृह बंद असल्यामुळे स्पर्धेत खंड पडला होता. पण आता नाट्यगृह सुरु होताच पुन्हा जोमाने आयोजक सोहम थिएटर्सचे सुदेश सावंत यांनी स्पर्धेची घोषणा आणि स्पर्धेच्या प्राथमिक आणि अंतिम फेरीच्या तारखा जाहीर केल्या आहेत . यंदाच्या वर्षी "मृणालताई नाट्यकरंडक-२०२२' खुली राज्यस्तरीय एकांकिका स्पर्धेची प्राथमिक फेरी २० जानेवारी ते २२ जानेवारी रोजी केशव गोरे स्मारक येथे होणार असून अंतिम फेरी २४ जानेवारीला प्रबोधनकार ठाकरे नाट्यगृह, बोरिवली(प) येथे पहिल्या दोन सत्रात होणार आहे. नाट्य चित्रपटसृष्टीतील अनेक नामवंत कलाकार एकांकिका स्पर्धेस उपस्थित राहणार आहेत.

२०१९ ला झालेल्या स्पर्धेच्या प्राथमिक फेरीत एकूण ६० स्पर्धक संस्थानी सहभाग घेतला होता. २ वर्षांच्या प्रदीर्घ प्रतिक्षेनंतरही  कलाकारांचा प्रतिसाद पाहता ' मृणालताई करंडक ' एकांकिका स्पर्धेला चांगला प्रतिसाद मिळेल असे सुदेश सावंत यांनी सांगितले.
मृणालताई नाट्यकरंडक ' या एकांकिका स्पर्धेत प्रथम येणाऱ्या एकांकिकेला रोख रक्कम ३१,००० / - आणि मानचिन्ह देऊन गौरविले जाईल. तसेच द्वितीय आणि लक्षवेधी एकांकिकांना अनुक्रमे २१,००० / - व ११,००० / - आणि मानचिन्ह देऊन गौरविण्यात येईल. त्याचबरोबर अनेक वैयक्तिक पारितोषिकेही देण्यात येणार आहेत . स्पर्धेत सहभागी होण्यासाठी आयोजक सुदेश सावंत ९८२१३५५२६४, समन्वयक संतोष वाडेकर- ८७७९९०४१९३, गिरीश सावंत ९८६७४४४४१८ यांना संपर्क करावा .