डोंबिवली : दक्षिण आफ्रिकेसह १२ देशांमध्ये आढळलेल्या कोरोनाच्या नव्या ओमिक्रॉन विषाणूमुळे जगभरात खळबळ उडाली आहे. दक्षिण आफ्रिके वरुन कर्नाटकात आलेले दोन प्रवासी कोरोना पॉझिटिव्ह आल्यामुळे चिंता वाढली आहे. अशावेळी आता डोंबिवलीतही दक्षिण आफ्रिकेवरुन आलेला एक प्रवासी कोरोना पॉझिटिव्ह आला आहे. डोंबिवलीत केपटाऊन  शहरातून आलेल्या एका प्रवाशाला कोरोनाची लागण झाल्याची आरोग्य विभागाच्या तपासणीत स्पष्ट झाले आहे. या रुग्णाचे नमुने मुंबई येथे जीनोम सिक्वेन्सिंगसाठी पाठवले जाणार आहेत.

डोंबिवलीत आढळून आलेल्या रुग्णाला ओमिक्रॉनची लागण झाली आहे का, हे अहवाल आल्यानंतरच स्पष्ट होऊ शकणार आहे. सध्या या रुग्णाला महापालिकेच्या विलगिकरण कक्षात ठेवण्यात आले आहे. तर या रुग्णाच्या भावाचे रिपोर्ट निगेटिव्ह आले आहेत. त्याच्या कुटुंबाची तपासणी उद्या केली जाणार असल्याचे महापालिकेच्या विभागाच्या आरोग्य अधिकारी डॉक्टर प्रतिभा पानपाटील यांनी सांगितले.

कर्नाटकमधील धारवाढ येथे एकाच कॉलेजमधील २८१ जणांना कोरोनाची लागण झाली आहे. एसडीएम मेडीकल कॉलेजमध्ये हा धक्कादायक प्रकार घडला आहे. त्यामुळे परिसरात भितीचं वातावरण पसरलंय. यातील केवळ ६ कोरोनाची लक्षणं आढळून आली असली आणि इतरांना लक्षणं नसली तरी अचानक झालेल्या वाढीनं खळबळ उडवून दिली आहे. कोरोना झालेल्यामध्ये विद्यार्थी शिक्षक कर्मचारी असा सर्वांचा समावेश आहे. शुक्रवारी एका दिवसात ९९ कोरोना रुग्ण आढळून आलेत. त्यामुळे आरोग्य विभागाची झोप उडाली आहे. कोरोनाचा नवा व्हेरिएंट आढळला असतानाच अचानक एवढी रुग्णवाढ म्हणजे दुष्काळात १३ वा महिना आल्यासारखे आहे.