मुंबई, २७ नोव्हें. (क्री. प्र.)  ३१ वी किशोर-किशोरी राष्ट्रीय अजिंक्यपद खो-खो स्पर्धेचे आयोजन २७ नोव्हेंबर ते १ डिसेंबर २०२१ या कालावधीत इंदिरा स्टेडीयम, नांगल रोड, उना, हिमाचल प्रदेश येथे करण्यात आले आहे. या स्पर्धेत महाराष्ट्राचे किशोर व किशोरी हे दोन्ही संघ सहभागी झालेले आहेत. या स्पर्धेसाठी तीन मॅट मैदाने तयार केली आहेत.  

या राष्ट्रीय खो-खो स्पर्धेचे उद्घाटन राज्यपाल विश्वनाथ अर्लेकर यांच्या हस्ते पार पडले. त्यावेळी मंत्री विरेन्द्र कंवर (कृषि, पंचायत राज व मत्स पालन मंत्री), एम. एस. त्यागी महासचिव ( भारतीय खो-खो महासंघ) व विविध क्षेत्रातील मान्यवर व खो-खो पदाधिकारी उपस्थित होते.  

कोविड-१९ मुळे छोट्या खेळाडूंचे संघ तयार करणे जिकरीचे झाल्यामुळे या राष्ट्रीय स्पर्धेत अरुणाचल प्रदेश, अंदमान-निकोबार, आसाम, दादरा-नगर हवेली, माणिपूर, नागालँड, पुंदूचेरी, सिक्किम, मेघालय यांचे दोन्ही तर चंडीगढ, गोवा व ओडिसा यांचे मुलींचे संघ स्पर्धेत सहभागी होणार नसल्याचे त्या त्या संघांनी कळवले आहे.  

उद्घाटना नंतर झालेल्या सामन्यात महाराष्ट्राचे सामने आज होणार नसल्याचे आयोजकां कडून कळवण्यात आले आहे. आज झालेल्या किशोरींच्या सामन्यात यजमान हिमाचल प्रदेशने बिहारचा २१-०४ असा एक डाव १७ गुणांनी धुव्वा उडवला. किशोरांच्या सामन्यात छत्तीसगडने गोव्याचा २६-०१ असा एक डाव २५ गुणांनी धुव्वा उडवला. तर किशोरांच्याच केरळने यजमान हिमाचल प्रदेशचा ८-६असा एक डाव ३ गुणांनी पराभव केला.