गोंदिया, दि.९ : साधन सुविधा नसलेल्या काळात दिवंगत मनोहरभाई पटेल यांनी उदात्त हेतूने केलेले शैक्षणिक व सामाजिक कार्य आजही प्रेरणादायी व अनुकरणीय असल्याचे प्रतिपादन राज्यपाल भगत सिंह कोश्यारी यांनी केले.

दि. मनोहरभाई पटेल यांच्या ११५ व्या जयंतीदिनाचे औचित्य साधून आयोजित  सुवर्णपदक प्रदान  समारोह कार्यक्रमात श्री. कोश्यारी बोलत होते. खासदार प्रफुल्ल पटेल, हरिहरभाई पटेल प्रमुख पाहुणे म्हणून उपस्थित होते. आमदार अभिजित वंजारी, विनोद अग्रवाल, सहसराम कोरोटे, विजय रहांगडाले, राजू कारेमोरे व नरेंद्र भोंडेकर यावेळी उपस्थित होते. दि. मनोहरभाई पटेल यांच्या प्रतिमेस पुष्पहार अर्पण करून राज्यपालांनी अभिवादन केले.  दीप प्रज्वलनाने कार्यक्रमाचे उद्घाटन झाले.

राज्यपाल श्री. कोश्यारी म्हणाले, अत्यंत प्रतिकूल परिस्थितीत गोंदिया शिक्षण संस्था उभी करून या भूमीत शैक्षणिक संस्कार रुजविण्याचे काम मनोहरभाईनी केले.  चांगले विचार व संस्कार माणसांना मोठे करतात. या संस्थेमधून हे संस्कार रुजविण्याचे काम अव्याहतपणे केले गेले आहे. मनोहरभाईंनी लावलेल्या या रोपट्याचे आज वटवृक्षात रूपांतर झाले आहे. महिलांनी प्रत्येक क्षेत्रात प्रगतीचे शिखर गाठले आहे.  पदक प्राप्त करणाऱ्यांमध्ये मुलींची संख्या जास्त असून ग्रामीण भागातील महिलांनी सुद्धा आपल्या कर्तुत्वाने विविध क्षेत्र पादाक्रांत केली आहेत.  मातृ-शक्तीचा हा जागर शैक्षणिक क्रांतीमुळेच शक्य झाल्याचे श्री. कोश्यारी यांनी सांगितले.

मनोहरभाईंचे शैक्षणिक व सामाजिक कार्य सर्वांनी आचरणात आणावे असे सांगून देशाच्या विकासासाठी व प्रगतीसाठी सर्वांनी एकत्रितपणे कार्य करण्याची आवश्यकता असल्याचे राज्यपाल कोश्यारी यांनी सांगितले. यावेळी राज्यपाल कोश्यारी यांच्या हस्ते गुणवंत विद्यार्थ्यांचा सन्मानपत्र देऊन गौरव करण्यात आला.

खासदार प्रफुल्ल पटेल म्हणाले, भंडारा-गोंदिया जिल्हा एक असतांना भंडारा येथे केवळ एकच शाळा होती, अशा परिस्थितीत विद्यार्थ्यांना शैक्षणिक सुविधा उपलब्ध करुन देण्यासाठी मनोहरभाईंनी एकाच दिवशी २२ हायस्कूलची उभारणी करून गोरगरीब व सामान्य कुटुंबातील विद्यार्थ्यांच्या शिक्षणाची सोय केली.  शिक्षण व समाजकार्याला महत्त्व देत त्यांनी गोंदिया शिक्षण संस्था उभारली व गोंदिया-भंडारा जिल्ह्यात शैक्षणिक क्रांती घडवून आणली. मनोहरभाईंनी केवळ शिक्षणच नाही तर सिंचनालाही महत्त्व दिले असे श्री. पटेल यांनी सांगितले. कार्यक्रमापूर्वी एनएमडी महाविद्यालयाच्या परिसरात आयोजित कृषी उत्पादन व हस्तकला प्रदर्शनीला श्री. कोश्यारी यांनी भेट दिली. एन.एम.डी महाविद्यालयातील रसायनशास्त्र प्रयोगशाळेचे उद्घाटन राज्यपालांच्या हस्ते करण्यात आले.

विविध परीक्षा व विषयात प्रावीण्य मिळविणाऱ्या विद्यार्थ्यांचा राज्यपालांच्या हस्ते सत्कार करण्यात आला. कोविड काळात उत्कृष्ट कार्य करणाऱ्या डॉ. सुवर्णा हुबेकर यांचाही यावेळी गौरव करण्यात आला. सुत्र संचलन व आभार प्रदर्शन माजी आमदार राजेंद्र जैन यांनी केले. विविध क्षेत्रातील गणमान्य व्यक्ती, प्राध्यापक व विद्यार्थी यावेळी उपस्थित होते.