पंख छाटलेल्या पोपटाची जागृत नागरिकाने भोंदू ज्योतिषाकडून केली सुटका
- by Adarsh Maharashtra
- Dec 20, 2020
- 1491 views
मुलुंड:(शेखर भोसले) पैशासाठी पोपटाचे पंख छाटून त्याला पिंजऱ्यात डांबणाऱ्या एका भोंदू ज्योतिषाकडून त्या पोपटाची सुटका करण्यात आली आहे. भांडुप येथे राहणाऱ्या एका जागृत नागरिकाने प्राणीमित्राला कळवून त्या पोपटाची सुखरूप सुटका केली आहे.
कुठल्याही प्राणी व पशूला बेकायदेशीरपणे डांबून ठेवून त्याला क्रूर वागणूक देणे हे वन्यजीव संरक्षण अधिनियम १९७२ च्या कायद्याअन्वये गुन्हा आहे. हे केल्यास कायदेशीर कारवाईला सामोरे जावे लागते. परंतु, काही ठिकाणी लोकांच्या मनोरंजनासाठी सर्रासपणे पशु-पक्षी व प्राण्यांशी हवे ते कृत्य करून त्यांना क्रूर वागणूक दिली जाते. असाच काहीसा प्रकार भांडुपमध्ये पाहायला मिळाल्यानंतर एक नागरिकाने प्राणीमित्राच्या साहाय्याने तो पोपट ताब्यात घेऊन त्याची सुखरूप सुटका केली.
भांडुपमध्ये राहणारे शत्रुघ्न गुप्ता यांचे तुलशेतपाडा येथे दुकान आहे. त्यांच्या दुकानाच्या काही अंतरावर एक भोंदू ज्योतिष पोपटाला पिंजऱ्यात डांबून काहीतरी बडबडत असल्याचे लक्षात आले असता गुप्ता यांनी जवळ जाऊन पाहिले असता त्या पोपटाचे दोन्ही पंख छाटले असल्याचे त्याच्या निदर्शनास आले. त्या ज्योतिषाला विचारले असता त्याने आपणच पोपटाने उडून जाऊ नये म्हणून पंख छाटले असल्याचे सांगितले. गुप्ता यांनी संधी साधत अम्मा केअर फाऊंडेशन (एसीएफ) आणि प्लांट अँड अँनिमल वेल्फेअर सोसायटी (पॉज-मुंबई) या प्राणीमित्र संस्थेला याची माहिती दिली. काही वेळाने पॉज मुंबईचे प्राणिमित्र याठिकाणी आल्याचे लक्षात येताच सदरच्या भोंदू ज्योतिषाने पिंजरा तेथेच सोडून पळ काढला.
सुटका केलेल्या पोपटाला पुढील वैद्यकीय तपासणीसाठी डॉ. राहुल मेश्राम यांच्या पशुवैद्यकीय कक्षात पाठवण्यात आले असून तो तंदुरुस्त आहे मात्र, पंख छाटल्यामुळे त्याला उडता येत नाही. त्यामुळे पुढील काही दिवस पोपटाला विशेष देखरेखीखाली ठेवावे लागणार असल्याचे डॉ.मेश्राम यांनी सांगितले.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम