बोगस बेस्ट पास बनवणारी टोळी गजाआड                                                                                                                                

एकूण ३७ बोगस पास जप्त; ४०० हून अधिक बोगस पास प्रवाशांना दिल्याचा संशय    

मुंबई:  बोगस बेस्ट पास बनवणाऱ्या टोळीला आज गाजाअड करण्यात आले. या टोळीतील मुख्य सूत्रधार हा पास बनवणाऱ्या ट्राय मॅक्स कंपनीचा कर्मचारी असून, त्याच्याकडून ३७ बोगस पास जप्त करण्यात आजले आहेत. या टोळीने वडाळा डेपोतून आतापर्यंत ४०० प्रवाशांना बोगस पास दिल्याचे तपासादरम्यान उघडकीस आले आहे. २९ ऑक्टोबर रोजी बेस्ट बस निरीक्षक राम मानसिंग शिंदे (५६) हे बेस्ट बस रुट क्र. ३६९ मध्ये तिकीट तपासणी करत होते. त्यावेळी प्रवासी पाशा शहाबुद्दीन शेख (२५) याचाकडील पास तपासला असता बोगस असल्याचा संशय शिंदे यांना आला. पाशा याला कुर्ला पूर्व येथील बेस्ट बस डेपोत आणून संगणकावर पासची तपासणी केली असता तो पास बोगस असल्याचे स्पष्ट झाले. शिंदे यांनी पाशाला चेंबूर पोलिसांच्या ताब्यात दिले. त्यांची कसून चौकशी केली असता त्याने बोगस पास बनवणाऱ्यांची माहिती दिली.
त्यानुसार वडाळा डेपोतून अनिकेत जाधव (२६), पाशा शेख (२५), अर्जुन पटेल (४३), अनुराग तिवारी (२१), कुशाल पाटील (२३) यांना भादंवि कलम ४२०, ४६५, ४६८, ४७१ नुसार गुन्हा दाखल करून अटक केली. यातील मुख्य आरोपी अनिकेत जाधव हा ट्रायमॅक्स कंपनीचा कर्मचारी असून, बेस्ट परिवहनने पास बनवण्याचे कंत्राट ट्रायमॅक्स कंपनीला दिले आहे. कारवाईदरम्यान अनिकेतकडून ३७ बोगस पास जप्त करण्यात आले असून, या सर्वांनी ४०० हून अधिक बोगस पास प्रवाशांना देऊन बेस्ट परिवहन उपक्रमचे हजारो रुपयांचे नुकसान केले आहे. या गुन्ह्याचा तपास सहाय्यक पोलीस आयुक्त जयराम मोरे, वपोनि जयप्रकाश भोसले यांच्या मार्गदर्शनाखाली पोनि (गुन्हे) प्रवीण तेजाळे, पोउनि एफ. के. मुलाणी, सपोउनि राजेंद्र जगताप, हवालदार विश्वास भोसले, पोना विलास देसाई, पोशि प्रताप जाधव, नितीन साळवे आदी पोलीस पथकाने केला.