मुंबई दि.२३: मानखुर्द  पोलीस ठाणे हद्दीमध्ये आज पीएनजी कॉलनी  चिकूवाडी इथं मनुष्य वस्ती असलेल्या झोपडपट्टीला मोठ्या प्रमाणात आग  लागली . स्थानिकांच्या आणि अग्निशमन दलाच्या अथक प्रयत्नांनी आगीवर नियंत्रण आणण्यात यश आलं  आहे. दुपारी ३ .००  वा. दरम्यान लाग लागली असल्याची माहिती मानखुर्द पोलिसांकडून देण्यात आली आहे. 

पोलिसांनी दिलेल्या माहितीनुसार, आगीची माहिती मिळताच तात्काळ सदर ठिकाणी पोलीस, दिवस पाळी पर्यवेक्षक निरीक्षक, गुन्हे प्रकटीकरण अधिकारी व पथक, गुंडा पथक, तसेच गस्तीवरील मोबाइल योग्य मनुष्यबळासह घटनास्थळी पोहोचले. याचवेळी अग्निशमन दलाच्या वाहनांना घटनास्थळी पाचारण करून आग आटोक्यात आणण्यात आली.

घटनास्थळी कोणतीही मनुष्य हानी झालेली नसून नागरिकांना सुरक्षित स्थळी हालवण्यात आलं आहे. तर या भीषण आगीमध्ये आठ ते दहा झोपड्या जळाल्या आहेत. पोलिसांनी दिलेल्या माहितीनुसार, आगीचे प्राथमिक कारण शॉर्टसर्किट असल्यामुळे या  बाबत सखोल चौकशी करून सविस्तर अहवाल सादर करण्यात येणार असल्याची माहिती पोलिसांकडून देण्यात आली  .

दरम्यान, अग्निशमन दलाच्या तीन गाड्यांनी घटनास्थळी वेळीच धाव घेतल्याने मोठा अनर्थ टळला. पोलीस आणि नागरिकांच्या मदतीने तातडीने वस्तीतील नागरिकांना सुरक्षित स्थळी हालवण्यात आलं. या भीषण आगीचा एक व्हीडिओदेखील समोर आला आहे. ज्यामध्ये  मोठ्या प्रमाणात आगीचे लोळ परिसरात पसरले होते. यामुळे नागरिकांमध्येही भीतीचं वातावरण पसरलं होते . अग्निशमन दलाने संपूर्ण आग विझवण्यात यश मिळवले  पोलीस पुढील तपास करत आहेत .