मुंबई : लोकप्रतिनिधींची ही जनतेशी कायम बांधिलकी असून कुलाबा कोळीवाडा येथील सिमेंट रस्त्याचे काम करताना महापालिका अधिकाऱ्यांनी गुणवत्तापूर्ण व दर्जेदार काम करण्यावर अधिक भर द्यावा, असे प्रतिपादन मुंबईच्या महापौर श्रीमती किशोरी पेडणेकर यांनी केले.      

कुलाबा कोळीवाडा लाल निगम रोड (भवन डॉक्टर) ते मोरया मंदिर जमशेदजी बंदर येथील रस्त्याच्या कामाचे भूमिपूजन महापौर किशोरी पेडणेकर यांच्या हस्ते आज दिनांक १० नोव्हेंबर २०२० रोजी मोरया मंदिर कुलाबा कोळीवाडा येथे पार पडले, त्यावेळी आयोजित छोटेखानी समारंभात महापौर बोलत होत्या.

याप्रसंगी स्थानिक नगरसेविका श्रीमती सुजाता सानप,विभागप्रमुख श्री. पांडुरंग सकपाळ, माजी नगरसेवक श्री. गणेश सानप,महापालिकेचे संबंधित अधिकारी तसेच नागरिक उपस्थित होते.

महापौर किशोरी पेडणेकर नागरिकांना मार्गदर्शन करताना यावेळी म्हणाल्या की,   "ऐ"विभागातील बचत निधीमधून या रस्त्याचे काम पूर्ण करण्यात येणार असून या कामासाठी स्थानिक नागरिकांचे सहकार्य मिळणे आवश्यक असल्याचे महापौर म्हणाल्या.सर्वप्रथम वस्ती असलेल्या कुलाबा कोळीवाडा येथून रस्त्याच्या कामाचा प्रारंभ करण्याची सूचना महापौरांनी केली जेणे करून नागरिकांना कोळीवाडयामध्ये प्रवेश करताना  कुठल्याही प्रकारे त्रास होता कामा नये. त्यासोबतच माजी नगरसेवक श्री गणेश सानप यांच्या सातत्यपूर्ण पाठपुराव्याने हे काम होत असून आगामी २५ वर्षे टिकेल असे दर्जेदार काम करण्याची सूचना महापौरांनी यावेळी संबंधित महापालिका अधिकाऱ्यांना केली. 

महापौर झाल्यानंतर याठिकाणी प्रथम मी भेट दिली होती. याभेटीतच या रस्त्याच्या कामाची गरज लक्षात घेऊन बचत निधीमधून हे काम घेण्याचे निर्देश महापालिका अधिकाऱ्यांना दिल्याचे महापौरांनी यावेळी सांगितले. स्थानिक नागरिकांनी महापालिका अधिकाऱ्यांना सहकार्य केल्यास तातडीने हे काम पूर्ण होण्यास मदत होणार असल्याचे महापौरांनी यावेळी सांगितले. त्यासोबतच येथील मोरया मंदिराचा जीर्णोद्धारचे  कामसुद्धा तातडीने हाती घेऊ, अशी ग्वाही महापौरांनी यावेळी दिली. 

विभागप्रमुख श्री. पांडुरंग सपकाळ यावेळी मार्गदर्शन करताना म्हणाले की, येथील रस्त्यासोबतच मोरया मंदिराचा जीर्णोद्धार करणेसुद्धा आवश्यक असून रस्त्याच्या कामानंतर आपण या कामाला प्राधान्य देणार असल्याचे सांगितले.  स्थानिक नागरिकांची बऱ्याच दिवसांची रस्त्याची मागणी आता या कामामुळे पूर्ण होत असल्याचे  सांगितले त्यासोबतच जेटीच्या बांधकामासाठी महाराष्ट्र शासनाची परवानगी घेण्यात येणार असल्याचे त्यांनी सांगितले.या सर्व कामांसाठी स्थानिक नागरिकांनी सहकार्य करावे असे आवाहन त्यांनी यावेळी केले.

माजी नगरसेवक श्री.गणेश सानप यांनी  आपल्या प्रास्ताविकातून महापौर किशोरी पेडणेकर यांच्या सातत्यपूर्ण पाठपुराव्यामुळे बचत निधीमधून हे काम करणे शक्य झाल्याचे सांगितले. याबद्दल महापौर किशोरी पेडणेकर यांचे त्यांनी आभार मानले.