मुंबई,दि.१० : महाराष्ट्र शासनाच्या अण्णासाहेब पाटील आर्थिक मागास विकास महामंडळाची पुनर्रचना करुन या महामंडळाच्या अध्यक्ष पदी अण्णासाहेब पाटील यांचे सुपुत्र व माथाडी कामगार नेते श्री नरेंद्र अण्णासाहेब पाटील यांची पुननियुक्ती करावी, अशी मागणी महाराष्ट्र राज्याचे मुख्यमंत्री ना.उध्दवजी ठाकरे   यांचेकडे महाराष्ट्र राज्य माथाडी,ट्रान्सपोर्ट आणि जनरल कामगार युनियनचे पदाधिकारी, तमाम माथाडी कामगार व मराठा समाजाने केली आहे.

हिंदु-हदयसम्राट मा.बाळासाहेब ठाकरे यांच्या सुचनेनुसार युती सरकारमध्ये तत्कालिन मुख्यमंत्री मा.मनोहर जोशी  असताना अण्णासाहेब पाटील आर्थिक मागास विकास महामंडळाची स्थापना करण्यात आली. राज्यात सेना-भाजप पक्षाचे सरकार असताना अण्णासाहेब पाटील आर्थिक मागास विकास महामंडळाला पुनर्जीवीत करुन या महामंडळावर स्व. आमदार अण्णासाहेब पाटील यांचे सुपुत्र व माथाडी कामगार नेते श्री.नरेंद्र अण्णासाहेब पाटील यांची अध्यक्ष म्हणून नेमणुक करण्यात आली होती.

अण्णासाहेब पाटील यांनी मराठा समाजाला न्याय मिळण्यासाठी आपल्या प्राणाचे बलिदान दिले,त्यांच्या नांवाने स्थापन झालेल्या अण्णासाहेब पाटील आर्थिक मागास विकास महामंडळाच्या अध्यक्ष पदी निवड झाल्यापासून श्री.नरेंद्र अण्णासाहेब पाटील यांनी महाराष्ट्रातील संपूर्ण जिल्ह्यांमध्ये दौरे करुन मराठा समाजातील युवकांना उद्योजक करण्यासाठी परिश्रम घेतले. कष्टाची कामे करणा-या तमाम माथाडी कामगारांना शासनाच्या माथाडी अॅक्ट, १९६९ व त्यान्चये स्थापन झालेल्या माथाडी बोर्डाच्या योजनेचे संरक्षण मिळवून देण्याचे संघटनेच्या सरचिटणीस या प्रमुख पदावर कार्य करण्याबरोबर श्री.नरेंद्र अण्णासाहेब पाटील यांनी अहोरात्र मेहनत घेऊन अण्णासाहेब पाटील आर्थिक मागास विकास महामंडळाच्या योजनेचा लाभ युवकांना मिळण्यासाठी कार्य करीत आहेत.

अण्णासाहेब पाटील आर्थिक मागास विकास मंडळ अध्यक्ष,उपाध्यक्ष व अशासकिय सदस्य व विशेष निमंत्रित यांच्या नियुक्त्या रद्द करण्याबाबतचा शासनाच्या कौशल्य विकास रोजगार व उद्योजकता विभागाच्या क्रमांक कौविउ-२०२०/प्र.क्र. १८/रोस्वरो१,दि. ०४ नोव्हेंबर, २०२० व्दारे शासन निर्णय काढलेला आहे.

यापुर्वी शासनाने इतर महामंडळाच्या नियुक्त्या रद्द केल्या. परंतु अण्णासाहेब पाटील आर्थिक मागास विकास मंडळाच्या अध्यक्ष पदावरील श्री.नरेंद्र अण्णासाहेब पाटील यांनी केलेल्या उल्लेखनिय कामाचा आढावा घेऊन त्यांची नियुक्ती शासनाने कायम केली. सध्या सदरच्या महामंडळाच्या नियुक्त्या रद्द केल्या असल्या तरी या महामंडळाची पुनर्रचना करुन अध्यक्ष पदी श्री.नरेंद्र अण्णासाहेब पाटील यांची पुनर्नियुक्ती व्हावी,अशी मागणी माथाडी कामगार युनियनचे पदाधिकारी तमाम माथाडी कामगार व मराठा समाजाच्यावतिने करण्यात आली आली आहे.

अण्णासाहेब पाटील आर्थिक मागास विकास महामंडळाच्या अध्यक्ष पदावर श्री.नरेंद्र अण्णासाहेब पाटील यांनी अत्यंत उल्लेखनिय कार्य केले आहे, असे असताना सद्यस्थितीत या महामंडळाच्या नियुक्त्या शासनाने रद्द केल्यामुळे तमाम माथाडी कामगार व मराठा समाजामध्ये असंतोष निर्माण झाला आहे,त्यामुळे मा.मुख्यमंत्री ना.उध्दवजी ठाकरे  यांनी सदर महामंडळाची पुनर्रचना करुन त्यावर श्री.नरेंद्र अण्णासाहेब पाटील यांची पुनर्नियुक्ती करण्याची आग्रही मागणी केली आहे.