'माझे कुटुंब, माझी जबाबदारी' अभियानाला मुलुंडमध्ये चांगला प्रतिसाद
- by Adarsh Maharashtra
- Oct 26, 2020
- 938 views
मुलुंड: (शेखर भोसले)पालिकेतर्फे संपूर्ण मुंबईभर राबविण्यात येत असलेल्या 'माझे कुटुंब, माझी जबाबदारी' या अभियाना अंतर्गत मुलुंडच्या टी वार्डात हे अभियान मोठ्या जोमाने राबविण्यात येत असून आतापर्यंत ९८ हजार कुटुंबियांची आरोग्य तपासणी करण्यात आली आहे तसेच रोज ७ हजार कुटुंबापर्यंत पोहचून प्रत्येक सदस्यांच्या आरोग्याची माहिती घेवून आरोग्य तपासणी व कोरोनाची लक्षणे तपासली जात आहेत. कोरोणाला रोखण्यासाठी शासनातर्फे चालू करण्यात आलेल्या या अभियानात मुलुंडकर नागरिक देखील पालिकेच्या पथकाला पूर्ण सहकार्य करुन सहभाग नोंदवीत आहेत.
मुख्यमंत्री उद्धव ठाकरे यांनी वाढत्या कोरोनाच्या फैलावाला नियंत्रणात आणण्यासाठी 'माझे कुटुंब, माझी जबाबदारी' ही मोहीम सुरू करून मुंबई महानगर पालिकेला ही मोहीम मुंबईतील प्रत्येक वार्डात आणि घराघरात राबविण्याचे आदेश दिले. त्याला अनुसरून मुलुंडच्या टी वार्डमध्ये १३९ पथके तयार करण्यात आली आहेत. एका पथकामध्ये तीन सदस्य असून त्यात पालिकेचा एक कर्मचारी आणि दोन स्वयंसेवक यांचा समावेश आहे. हे पथक मुलुंड मधील प्रत्येक घराघरात जावून लोकांचा सर्व्हे करत असून कुटुंबातील सदस्यांची आरोग्याबाबत माहिती घेत आहेत. थर्मल गन आणि ऑक्सिमीटरच्या साहाय्याने घरातील प्रत्येक व्यक्तीचे तापमान आणि ऑक्सिजनची पातळी तपासली जात आहे व याद्वारे कोरोनाचे रुग्ण शोधले जात आहेत. तसेच घरातील सदस्यांना असलेल्या इतर आजारांची जसे की हृदयविकार, डायबेटीस, डायलिसीस, उच्च रक्तदाब, इत्यादींची माहिती घेवून त्यांना मदत केली जात आहे.
"मुलुंडमध्ये २६ सप्टेंबर पासून प्रत्येक घराघरात जावून पालिकेच्या टी वार्डातील पथकातर्फे नागरिकांच्या आरोग्याची तपासणी केली जात असून या तपासणीत जर एखाद्या व्यक्तीमध्ये कोरोणाची लक्षणे आढळली तर त्या व्यक्तीला लगेच उपचारांच्या कक्षेत आणले जात आहे. त्यानंतर त्याच्यावर पुढील आवश्यक उपचार केले जात आहेत. या मोहिमेमुळे प्रारंभीच्या काळात कोरोणा रुग्ण वाढल्याचे दिसले असले तरी आता या अभियानाचे चांगले परिणाम दिसून येत आहे व त्यामुळे कोरोणाला रोखण्यात मदतच झाली असून रोजच्या कोरोणा रुग्ण संख्येत देखील घट झाल्याचे दिसून येत आहे", असे पालिकेच्या टी वार्डाच्या आरोग्य अधिकाऱ्यांनी सांगितले.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम