मुंबई(प्रतिनिधी) यंदाच्या वर्षी कोरोना ह्या जागतिक महामारीच्या पार्श्वभूमीवर  ६४ वा धम्मचक्र प्रवर्तन दिन(अशोक विजयादशमी) सार्वजनिकरित्या साजरा न करता आपण हा महान दिन  आपापल्या घरातच साजरा करूया  धम्मचक्र प्रवर्तन दिनाच्या रोजी आपण  आपल्या प्रत्येकाच्या घरोघरी अशोका विजयादशमी दिन अगदी सणा सारखाच आनंदमय वातावरणात सहकुटुंब साजरा करण्याचे आवाहन भिम आर्मीच्या वतीने महाराष्ट्र राज्य प्रचार-प्रसिद्धी प्रमुख भिमपँथर मा.राजेश गवळी यांनी करतानाच सर्व जनतेला धम्मचक्र प्रवर्तन दिन आणि अशोका विजयादशमीच्या मंगल शुभेच्छा दिल्या.

 तथागत बुद्ध , महात्मा अशोक आणि संविधान निर्माते डॉ.बाबासाहेब आंबेडकर विचाररूपाने घराघरात आले तरच आपल्या घरामध्ये ह्या महामानवांच्या विचारांचे संस्कार येतील. आपल्या नव्या पिढीला तथागत बुद्ध-महात्मा अशोक-बाबासाहेबांच्या विचारांची ओळख आपल्या घरातुनच व्हायला हवी.ह्यासाठी सर्व प्रबुद्ध जनतेने हा धम्मचक्र प्रवर्तन दिन साजरा करण्यासाठी पुढील प्रमाणे नियोजन करण्याचे आवाहन भिमपँथर मा.राजेश गवळी यांनी एका प्रसिद्धी पत्रकाद्वारे केले आहे.

१) अशोका विजयादशमीच्या आदल्या दिवशी आपल्या परिसरातील बुद्ध विहार स्वच्छ करून त्यातील महामानवांच्या मुर्त्या-तसबिरी स्वच्छ करून , अगरबत्ती-मेणबत्त्या प्रज्वलित करून सामूहिकरीत्या बुद्धवंदना घ्यावी दुसऱ्या दिवशी म्हणजे धम्मचक्र प्रवर्तन दिनाच्या दिवशी सुद्धा सकाळी ९.०० वाजता सामूहिक बुद्धवंदना घ्यावी.(हे सर्व करीत असताना निवडक व्यक्तींनीच तिथे सुरक्षित अंतर ठेवून ,मास्क लावून उपस्थित रहावे.)

२) सकाळी लवकर उठुन दारात रांगोळी काढावी. शक्यतो घरावर निळा  झेंडा लावावा.  कंदील असेल तर दारासमोर कंदील लावावा.स्वयंपाकघरात खीर इत्यादी गोड अन्नपदार्थ बनवावेत.

३) घरात छोटी-मोठी सजावट करावी , रोषणाई करावी. एका टेबलावर पांढरा शुभ्र कपडा टाकून त्यावर तथागत बुद्धांची , चक्रवर्ती सम्राट अशोक महान आणि डॉ.बाबासाहेब आंबेडकर यांची  मुर्ती अथवा प्रतिमा ठेवावी. त्यास सहकुटुंब हार किंवा पुष्प अर्पण करून मेणबत्त्या आणि अगरबत्ती लावाव्यात,आणि घरातल्या घरात सुद्धा सुरक्षित अंतर ठेवून  बुद्धवंदना घ्यावी.

४) घरातील मुलामुलींना आणि इतर सदस्यांना सदरहू महामानवांच्या  चरित्रावरील पुस्तकं देऊन त्याचे वाचन करण्यात यावे. कुटुंबासोबत महामानवांच्या चरित्रावर चर्चा करावी. महामानवांच्या चरित्रातील प्रेरणादायक गोष्टी लहानांना समजावुन सांगाव्यात.

५ ) जमल्यास आपल्या भोवतालच्या  उपेक्षित, गरीब, शोषित, अनाथ अथवा गरजुंना यथाशक्ती मदत करावी.

६) आपण घरी सहकुटुंब साजरी केलेल्या अशोक विजयादशमीचे  फोटो #घरोघरी धम्मचक्र प्रवर्तन दिन, या हॅशटॅगसह सोशल मिडीयावर अपलोड करावेत. जेणेकरुन या संकल्पनेचा जास्तीत जास्त प्रचार होऊन सर्वत्र घरोघरी धम्मचक्र प्रवर्तन दिन साजरा होईल.

७) ह्या महान दिनानिमित्त एकमेकांना शुभेच्छा देताना शारीरिक अंतर ठेवून फुलांची आदानप्रदान करावी.असे आवाहन करतानाच कोरोना संबंधी शासनाने घालून दिलेल्या सर्व नियमांचे आपण काटेकोरपणे पालन करण्याचेही आवाहन भिमपँथर मा.राजेश गवळी यांनी केले आहे.