मुंबई : हिंद मजदूर सभा आणि बंदर व गोदी कामगारांचे नेते,मुंबई पोर्ट ट्रस्ट डॉक अँड जनरल एम्प्लॉईज युनियन, ऑल इंडिया पोर्ट अँड डॉक वर्कर्स फेडरेशन( वर्कर्स)चे जनरल सेक्रेटरी, डॉ. शांती पटेल यांच्यानंतर मुंबई पोर्ट ट्रस्टचे विश्वस्त असलेले सुधाकर अपराज यांची भारत सरकारच्या श्रम मंत्रालयाने हिंद मजदूर सभेच्या शिफारशीनुसार दत्तोपंत ठेंगडी राष्ट्रीय कामगार शिक्षण मंडळाच्या सदस्य पदावर दुसऱ्यांदा फेरनियुक्ती केली आहे. डॉ. शांती पटेल, उमरावमल पुरोहित व शरद राव यांच्या प्रयत्नामुळे हिंद मजदूर सभा व हिंद मजदूर किसन पंचायत या दोन मोठ्या केंद्रीय कामगार संघटनांचे २३ ऑक्टोबर २०१० रोजी मुंबईत कामगार क्रीडा मैदानावर राष्ट्रवादी काँग्रेसचे अध्यक्ष मा. श्री. शरद पवार यांच्या उपस्थित विलीनीकरण  संपन्न झाले, या घटनेला दहा वर्षे झाली. हिंद मजदूर सभेचे भारतात  नव्वद लाख कामगार सदस्य आहेत.

सुधाकर अपराज १९७१ साली मुंबई पोर्ट ट्रस्टच्या वैद्यकीय खात्यात लिपीक म्हणून नोकरीला लागले. " कमवा व शिका" या माध्यमातून त्यांनी पदवीपर्यंतचे शिक्षण पूर्ण केले.मुंबई पोर्ट ट्रस्टच्या इस्टेट डीपार्टमेंटमध्ये लीगल असिस्टंट म्हणून काम करीत असताना स्मॉल कॉज कोर्ट, सिटी सिव्हिल कोर्ट तसेच मुंबई हायकोर्टातील मुंबई पोर्ट ट्रस्टच्या इस्टेट संबंधित केसेसचे त्यांनी काम पाहिले. १९८७ साली सुधाकर अपराज यांना महाराष्ट्र राज्याचे तत्कालीन राज्यपाल डॉ. शंकर दयाळ शर्मा यांच्या हस्ते " गुणवंत कामगार पुरस्कार " मिळाला. मुंबई पोर्ट ट्रस्टमधील ग्राहक संस्था, पतसंस्था व उपहारगृह या सहकारी संस्थांच्या संचालक पदावर त्यांनी कार्य केले आहे. १९८२ साली महाराष्ट्र शासनाने  " विशेष कार्यकारी अधिकारी "  म्हणून सुधाकर अपराज यांची निवड केली होती. मुंबई पोर्ट ट्रस्टच्या गोदी सुरक्षा समितीमध्ये ते कामगारांना कामाच्या ठिकाणी सुरक्षा मिळावी म्हणून कामगारांची समर्थपणे बाजू मांडतात. भारत सरकारने बंदर व गोदी कामगारांसाठी नियुक्त केलेल्या निवृत्त वेतन समितीत सुधाकर अपराज हे मुंबई बंदरातून एकमेव सदस्य होते. खातेनिहाय चौकशीत त्यांनी अनेक कामगारांच्या नोकऱ्या वाचविल्या असून कामगारांना न्याय मिळवून दिला आहे. तसेच युनियनच्या वतीने मुंबई पोर्ट ट्रस्टमध्ये अनुकंपातत्वावर नोकऱ्या मिळून देण्याचे काम त्यांनी केले आहे.

सुधाकर अपराज हे मुंबई पोर्ट ट्रस्टमध्ये नोकरीला लागल्यापासून मुंबई पोर्ट ट्रस्ट डॉक अँड जनरल एम्प्लॉईज युनियनचे निष्ठावंत कार्यकर्ते, तसेच गेल्या चार तपाहून अधिक  कालावधी ते युनियनचे सेक्रेटरी म्हणून कार्यरत होते. आता ते युनियनचे तसेच ऑल इंडिया पोर्ट अँड डॉक वर्कर्स फेडरेशन (वर्कर्सचे)जनरल सेक्रेटरी, महाराष्ट्र हिंद मजदूर सभेचे ते कार्याध्यक्ष, स्टील मेटल अँड इंजिनिअरिंग वर्कर्स फेडरेशन ऑफ इंडियाचे खजिनदार, सौराष्ट्र कर्मचारी संघटनेचे जनरल सेक्रेटरी, अशा अनेक संघटनेवर ते कार्यरत आहेत. आतापर्यंत त्यांनी लंडन, जपान, स्वीडन, सिंगापूर असे अनेक परदेशी  अभ्यासदौरे केले आहेत. चिंदर ग्रामस्थ मंडळ, मुंबई या सेवाभावी संस्थेचे ते कार्याध्यक्ष असून, त्यांनी आपल्या गावी सर्वांच्या सहकार्याने अनेक कामे केली आहेत. कामगार चळवळीतील योगदानाबद्दल भारतीय कामगार कर्मचारी महासंघातर्फे त्यांना " द्रोणाचार्य पुरस्कार" मिळाला आहे.
अशा प्रकारे सुधाकर अपराज हे अनेक सामाजिक संस्था व कामगार  संघटनांमध्ये कार्यरत आहेत. भारत सरकारने सुधाकर अपराज यांची दत्तोपंत ठेंगडी राष्ट्रीय कामगार शिक्षण मंडळावर  दुसऱ्यांदा फेरनियुक्ती केल्याबद्दल बंदर व गोदी कामगारांतर्फे हार्दिक अभिनंदन