मुंबई : भोजपुरी चित्रपटांतील सुपरस्टार व प्रतिभावान अभिनेता सुदीप पांडे यांना राष्ट्रवादी काँग्रेस पार्टीच्या (एनसीपी) मुंबई कार्यालयात प्रफुल्ल पटेल, जयंत पाटील अशा पक्षाच्या ज्येष्ठ नेत्यांच्या उपस्थितीत १३ ऑक्टोबर २०२० रोजी पक्षात सामील करण्यात आले. त्यानंतर १४ ऑक्टोबर २०२० रोजी एनसीपीचे मुंबई प्रदेशाध्यक्ष श्री. नवाब मालिक यांच्या हस्ते सुदीप पांडे यांना मुंबईचे सरचिटणीस म्हणून नियुक्ती पत्र देण्यात आले. याप्रसंगी नवाब मलिक, रोहित पवार, संजय तटकरे, रवींद्र मानगावे यांच्यासह पक्षाचे असंख्य कार्यकर्ते उपस्थित होते. याचवेळी सुदीप पांडे यांना बिहारमध्ये होत असलेल्या आगामी निवडणुकीसाठी राष्ट्रवादी काँग्रेस पार्टीचे स्टार प्रचारक म्हणूनही नियुक्त करण्यात आले.

याप्रसंगी अभिनेता सुदीप पांडे म्हणाले, ‘शरद पवारजी, प्रफुल्ल पटेलजी, जयंत पाटिलजी, अजीत पवारजी, सुप्रिया सुळे मॅडम, अनिल देशमुख सर, छगन भुजबळ सर, नवाब मालिकजी, पक्षाचे सर्व पदाधिकारी आणि कार्यकर्त्यांचे मी आभार मानतो. महाराष्ट्राच्या विकासात शरद पवारजी यांचे योगदान विसरता येणे शक्य नाही. त्यांनी राज्याच्या विकासासाठी आपल्या आयुष्यातील बहुमोल अशी 50हून जास्त वर्षे दिली आहेत. म्हणूनच एनसीपी परिवाराचा एक भाग होताना मला अभिमान वाटतो. माझ्यावर सोपवण्यात आलेली ही जबाबदारी मी पूर्ण इमानदारी आणि प्रामाणिकपणे पार पाडण्याचा प्रयत्न करेन आणि यात यशस्वी होईन.’

सुदीप पांडे यांच्या रूपाने राष्ट्रवादी काँग्रेस पक्षाचा नव्या आणि तरूण उत्तर भारतीय चेहऱ्याचा शोध आता पूर्ण झाला आहे. एनसीपीमध्ये आताच्या काळात बहुतांश सुशिक्षित आणि चांगले लोक आहेत. यामुळेच त्यांनी सॉफ्टवेयर इंजीनियर असलेल्या सुदीप पांडे यांनाही आपल्या पक्षात सामील करून घेतले आहे. भोजपुरी सिनेमातील सुपरहिट एक्शन हीरो सुदीप पांडे यांनी सुपरहिट झालेल्या ‘भोजपुरिया भैया’ या भोजपुरी सिनेमाद्वारे आपले फिल्मी करीयर सुरू केले होते. त्यापूर्वीही त्यांनी ‘मसीहा बाबू’, ‘सौतन’, ‘शराबी’, ‘कुर्बानी’ वगैरे तब्बल 40हून अधिक चित्रपटांमध्ये नायक म्हणून काम केले आहे. त्यांचा पहिला हिंदी चित्रपट ‘व्ही फॉर व्हिक्टर’ होता, जो खूपच लोकप्रिय झाला होता.