बोलबच्चनगिरी करत चोरट्यांनी मुलुंड मध्ये एका दुकानदाराला लुटले.
- by Adarsh Maharashtra
- Sep 27, 2020
- 2665 views
मुलुंड :(शेखर भोसले) बोलबच्चनगिरी करत दोन युवकांनी एका दुकानदाराला लुटल्याची घटना नुकतीच मुलुंड पूर्व येथे घडली असून लुटारूंनी दुकानदाराला बोलण्यात गुंतवून दुकानातील एका बॅगेत असलेले ६७००० रुपये चोरून पोबारा केला आहे.
मुलुंड पूर्व येथील लोकमान्य टिळक रोडवर असलेल्या वेंकीज, साहिल फूड अँड कोल्ड स्टोरेज या दुकानाचे मालक संजय फडणवीस यांनी दिलेल्या माहितीनुसार शुक्रवार दि २५ सप्टेंबर रोजी दुपारी ४-३० च्या सुमारास एक १६ वर्षाचा युवक काही सामान खरेदीच्या बहाण्याने दुकानात आला. दुपारची वेळ असल्याने नोकर जेवायला गेल्याने दुकानमालक दुकानात एकटेच होते. दुकान मालकाला वस्तू खरेदीच्या बहाण्याने या युवकाने बोलण्यात गुंतवून ठेवले. तेवढ्याच दुसऱ्या बाजूने एक २० ते २२ वर्षांचा दुसरा मुलगा दुकानात आत शिरला. दुकाना बाहेर उभ्या असलेल्या खरेदीदार मुलाशी दुकानमालक बोलण्यात गुंतले असताना आत शिरलेल्या या युवकाने दुकान मालकाच्या खुर्चीच्या बाजूला असलेली काऊंटर जवळील बॅग घेतली व ती उघडून त्यात असलेले ६७००० रुपये हातचलाखीने काढले आणि ते पैसे घेवून या चोरट्याने दुकानातून पळ काढला. आतील युवक बाहेर पडताच दुकानाबाहेर दुकान मालकाशी बोलत असलेला, दुसरा १६ वर्षाचा मुलगा देखील तेथून निघाला. दुकान मालकाला काहीतरी घडल्याची तेवढ्याच जाणीव झाल्याने त्याने आपल्या खुर्चीच्या बाजूला ठेवलेली पैशांची बॅग बघितली. परंतु बॅग न दिसल्याने ते काउंटर बाहेर आले, तर चैन खुल्या अवस्थेत काऊंटरच्या बाहेर बॅग दिसली, मात्र बॅगेच्या आतील ६७००० रुपयांचे पैशांचे बंडल मात्र गायब होते. घडला प्रकार लक्षात आल्याने व आपण लुटले गेले असल्याची जाणीव झाल्याने त्यांनी आरडाओरड केला व बाहेर येऊन या चोरटयांना पकडण्यासाठी धाव घेतली परंतु बाहेर रस्त्यावर उभ्या असलेल्या एका रिक्षात बसून या दोन्ही मुलांनी तेवढ्यात पळ काढला होता. ताबडतोब नवघर पोलिस स्टेशनला जाऊन दुकान मालक संजय फडणवीस यांनी तक्रार नोंदवली. पोलिस निरीक्षक परशराम सुर्यगंध यांनी तक्रार नोंदवून घेतली असून चोरट्यांचा पोलिस शोध घेत आहेत.बाजूच्या दुकानातील सीसीटीव्ही फुटेज पोलिसांच्या हाती लागले असून त्या अनुषंगाने सहाय्यक पोलिस आयुक्त शिंदे आणि वरिष्ठ पोलिस निरीक्षक पुष्कराज सूर्यवंशी यांच्या मागदर्शनाखाली पोलिस निरीक्षक परशराम सुर्यगंध हे अधिक तपास करीत आहेत.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम