मुंबई:कोव्हीड संकटाचा फायदा घेऊन  केंद्र सरकारने घाई घाईने चालू लोकसभा अधिवेशनात तीन कामगार कायद्यात बदल करणारे कामगार विरोधी सुधारणा विधेयक  बिल आणल्यामुळे कामगार वर्गामध्ये प्रचंड असंतोष आहे . कामगार व शेतकऱ्यांच्या कायद्यातील बदलला विरोध करण्यासाठी भारतातील प्रमुख सर्व केंद्रीय कामगार संघटनांनी आज केंद्र सरकारच्या कामगार विरोधी धोरणाचा  जाहीर निषेध म्हणून देशव्यापी आंदोलन केले.

महाराष्ट्रात देखील कामगार संघटना कृती समितीच्या वतीने ठिकठिकाणी आंदोलने झाली.  हिंद मजदूर सभेशी संलग्न असणाऱ्या पोर्ट, रेल्वे, एस. टी.,बेस्ट, मुंबई महानगर पालिका,  डिफेन्स, कोल इंडिया, इत्यादी उद्योगातील  सर्व कामगार संघटनानी  काळ्या फिती, निदर्शने, मोर्चा, मानवी साखळी काढून सुरक्षीत अंतर ठेवून आंदोलन केले. आज कामगारांनी आपली प्रचंड नाराजी व्यक्त करून आंदोलन केले. असे महाराष्ट्र हिंद मजदूर सभेचे सरचिटणीस संजय वढावकर यांनी सांगितले.

सार्वजनिक उद्योग कार्पोरेट क्षेत्राला दिले जात आहे. कोट्यवधी स्थलांतरित कामगारांच्या नोकऱ्या गेल्या आहेत,कामगारांच्या हाताला काम नाही, शेतकऱ्यांच्या जमिनी शेतीमालाच्या बाजारपेठा कार्पोरेट मालकांच्या हातात दिल्या जात आहेत, बँकिंग व्यवस्था व अर्थव्यवस्था नष्ट करून ती कार्पोरेट क्षेत्राच्या हातात देण्याचा डाव आहे. छोटे उद्योगधंदे मोदी धोरणामुळे नष्ट होत आहेत. एकूणच सर्व कामगार , शेतकरी, कष्टकटी मजूर यांच्या हक्कावर गदा येत आहे.

नवीन कामगार कायद्यात मालकांना पाहिजे त्या वेळेला कामगारांना कामावर ठेवता येईल व हवे तेंव्हा काढून टाकता येईल, अशी व्यवस्था करण्यात आली आहे. 300 पेक्षा कमी कामगार असलेले उद्योग बंद करण्यासाठी आता सरकारच्या परवानगीची गरज नाही. गेल्या शंभर वर्षाचा कामगार चळवळीच्या संघर्षातून निर्माण झालेले कायदेशीर लाभ, सुरक्षा, संरक्षणही संपुष्टात आणण्यात येत आहेत.

कामगार कायद्यातील बदल, मेजर पोर्ट ऑथोरिटी बील मध्ये होणारा बदल याविरुद्ध  मुंबई पोर्ट ट्रस्ट डॉक अँड जनरल एम्प्लॉईज युनियन व  ट्रान्स्पोर्ट अँड डॉक वर्कर्स युनियन यांच्या  संयुक्त विद्यमाने  श्रमिक भवन , कर्नाक बंदर येथे गोदी कामगारांनी  प्रचंड निदर्शने केली.  त्यावेळेस महाराष्ट्र हिंद मजदूर सभेचे कार्याध्यक्ष  सुधाकर अपराज, खजिनदार निवृत्ती धुमाळ व ट्रान्सपोर्ट अँड डॉक वर्कर्सचे सचिव राजाराम शिंदे उपस्थित होते.  महाराष्ट्र हिंद मजदूर सभेचे व जनरल मजदूर सभेचे जनरल सेक्रेटरी संजय वढावकर यांच्यावतीने डोंबिवली, वागळे इस्टेट, ठाणे, तळोजा, नवी मुंबई, अशा विविध ठिकाणी आंदोलने करण्यात आली. म्युनिसिपल मजदूर युनियनच्या वतीने बांद्रा येथे आंदोलन झाले. एस.  टी. कामगारांनी विविध डेपोमध्ये निदर्शने केली. इंडिया सेक्युरिटी प्रेसच्या कामगारांनी नाशिक येथे निदर्शने केली. महाराष्ट्रात मुंबई, ठाणे, नवी मुंबई, सांगली, पुणे, सोलापूर, नाशिक, औरंगाबाद, नागपूर, इत्यादी शहरामध्ये कामगार संघटना कृती समितीतर्फे झालेल्या आंदोलनात हिंद मजदूर सभेचे कामगार, कार्यकर्ते मोठ्या संख्येने सहभागी झाले होते.