मुलुंड :(शेखर भोसले)  रत्नागिरी जिल्हातील खेड तालुक्यातील खोपी गावचे सुपुत्र व 'सातगाव भोसले प्रतिष्ठान'चे संस्थापकीय अध्यक्ष धनंजय दिनकर भोसले यांचे मंगळवार दि. १५ सप्टेंबर रोजी नवी मुंबई येथील इस्पितळात उपचारादरम्यान दुःखद निधन झाले. ते ४८ वर्षाचे होते. पूर्णवेळ समाजसेवा व स्वतःचा बांधकाम व्यवसाय करण्यासाठी कै. धनंजय भोसले यांनी सरकारी नोकरीचा गेल्याच वर्षी राजीनामा दिला होता. 

'सातगाव भोसले प्रतिष्ठान' या संस्थेच्या स्थापनेसाठी मागील २ वर्षांपासून सतत मेहनत घेत होते. अध्यक्षपदाच्या जबाबदारीतून सातत्याने कार्यरत राहून व अनेक अडचणींना सामोरे जाऊन केवळ १ वर्षात त्यांनी संस्थेची नियोजनबद्धरित्या पायाभरणी केली. 'रत्नागिरी जिल्हा मराठा सेवा संघा'चे कार्यतत्पर सचिव म्हणून ते नवी मुंबई विभागात सुपरिचित होते. 'जे बोलतो ते करतो' अशी त्यांची कार्यशैली होती. कोरोनाकाळात स्वतःच्या जीवाची पर्वा न करता सातगाव व खेड परिसरात जाऊन त्यांनी स्वखर्चाने औषध वाटप केले, अनेक कोरोना पेशंटना हॉस्पिटलमध्ये बेड व औषधे मिळवून देण्यासाठी मदत केली, अनेक गरजूंना वेळोवेळी विविध प्रकारची मदत केली. 

'सातगाव भोसले' कुळातील उगवता तारा आज अचानक आपल्या सर्वांच्या नजरेआड गेला असून त्यांच्या अकाली मृत्यूची धक्कादायक बातमी आजही खरी वाटत नाही आहे. त्यांच्या जाण्याने जी पोकळी निर्माण झाली आहे ती भरून येणे अशक्य आहे. समाजात सर्वांनाच आपलेसे वाटणाऱ्या आपल्या लाडक्या बंधूना गमावल्याने फार मोठी हानी झाली आहे. सातगाव भोसले प्रतिष्ठानचे कार्यकारी मंडळ, सभासद आणि समस्त सातगाव परिवार, आम्ही सर्वजण त्यांच्या कुटूंबियांच्या दुःखात सहभागी आहोत. ईश्वर त्यांच्या आत्म्यास शांती देवो, हीच प्रार्थना आणि भावपूर्ण श्रद्धांजली, अश्या शब्दात सातगाव भोसले प्रतिष्ठानचे कार्यवाह परशुराम भोसले यांनी श्रद्धांजली अर्पण करून दुःख व्यक्त केले आहे.