मुंबई (प्रतिनिधी) : यंदा कोविड १९ संसर्गाच्‍या पार्श्‍वभूमीवर श्री गणेशोत्‍सव संपूर्ण सुरक्षितता राखून आणि उत्सवाचे संपूर्ण पावित्र्य जपून साजरा करण्‍याच्‍या आवाहनाला मुंबईकरांनी दिलेला प्रतिसाद वाखाणण्‍याजोगा आहे. संपूर्ण गणेशोत्‍सव सोहळा तसेच अनंत चतुर्दशी दिनी श्री गणेश मूर्ती विसर्जन हे शांततेत तसेच सर्व सहकार्याने पार पडले. यासाठी सर्व सार्वजनिक गणेशोत्‍सव मंडळे, विविध गणेशोत्‍सव समन्‍वय समिती यांच्‍यासह मुंबईकर जनतेचे महापौर श्रीमती किशोरी किशोर पेडणेकर व महानगरपालिका आयुक्‍त श्री. इकबाल सिंह चहल यांनी विशेष आभार मानले आहेत.

यंदाच्‍या श्री गणेशोत्‍सवात संपूर्ण मुंबईतील ७० नैसर्गिक स्‍थळे तसेच जवळपास १९९ कृत्रिम तलावांत मिळून सुमारे १ लाख ३५ हजार श्री गणेशमूर्तींचे विसर्जन करण्‍यात आले आहे. पैकी कृत्रिम तलावांमध्‍ये विसर्जित करण्‍यात आलेल्‍या मूर्तींची संख्‍या ही ७० हजार २३३ इतकी आहे. कृत्रिम तलावांमध्‍ये मूर्ती विसर्जित करण्‍याच्‍या आवाहनला भरघोस प्रतिसाद मिळाल्‍याचे त्‍यातून स्‍पष्‍ट होते.

मुंबईनगरीत दहा दिवसांपूर्वी आगमन झालेल्या श्री गणरायाला मुंबईकरांनी काल (१ सप्टेंबर २०२०) भावपूर्ण वातावरणात नि शांततेत तसेच सर्व मार्गदर्शक सुचनांचे पालन करुन निरोप दिला. यंदाचा गणेशोत्‍सव उत्‍साहात साजरा करताना, कोरोना विषाणू संसर्ग लक्षात घेता योग्‍य ती खबरदारी देखील बाळगणे गरजेचे आहे, त्‍यासाठी सर्वांनी सहकार्य करावे, असे आवाहन महाराष्‍ट्राचे मुख्‍यमंत्री श्री. उद्धव ठाकरे यांनी जनतेला केले होते. मुख्‍यमंत्री महोदयांच्‍या मार्गदर्शनाने मुंबई महानगरपाल‍िकेने कोविडबाबतची आवश्‍यक ती सर्व खबरदारी घ्‍ोत निरनिराळ्या उपाययोजना केल्‍या होत्‍या. सर्व नागरिकांनी मास्‍कचा वापर करणे, सुरक्षित दूरीकरण राखणे, श्री गणेश मूर्तीची उंची मर्यादीत राखणे, मिरवणुका टाळणे, महानगरपालिकेने ठिकठिकाणी व्‍यवस्‍था केलेल्‍या मूर्ती संकलन केंद्रांवर मूर्ती सोपविणे, सर्व विभागांमध्‍ये उपलब्‍ध असलेल्‍या कृत्रि‍म तलावांमध्‍ये तसेच शक्‍यतो घरच्‍या घरी मूर्ती विसर्जन करणे अशा निरनिराळ्या सूचनाही महानगरपालिका प्रशासनाकडून निर्गमित करण्‍यात आल्‍या होत्‍या. या सर्व आवाहनांना नागरिकांनी, सार्वजनिक गणेशोत्‍सव मंडळांनी संपूर्ण प्रतिसाद दिला. यातून मुंबईकरांची एकजूट आण‍ि सहकार्याची भावना पुन्‍हा एकदा सर्वांनी अनुभवली. त्‍याचे अनुकरण इतरांनी करावे असेच आहे, असेही महापौर व आयुक्‍त यांनी संयुक्‍तपणे नमूद केले आहे.   

मुंबईकर जनतेसमवेत महानगरपालिका प्रशासनाला सहकार्य करणारे पोलीस दल, वाहतूक पोलीस, नौदल, इतर शासकीय  व निम-शासकीय यंत्रणा, तटरक्षक दल, हॅम रेडिओ, सर्व प्रसारमाध्यमे, खासगी तसेच सेवाभावी संस्था यांचेही महापौर श्रीमती किशोरी पेडणेकर व महापालिका आयुक्त श्री. इकबाल सिंह चहल यांनी आभार मानले आहेत.   

महानगरपालिकेचे ७ पर‍िमंडळीय उपआयुक्‍त, सर्व २४ विभागांचे सहाय्यक आयुक्त, त्यांची संपूर्ण यंत्रणा तसेच मध्यवर्ती यंत्रणा यांनी आपापल्या हद्दीतील गणेशोत्‍सवालील सर्व कामकाज योग्‍यरित्‍या पूर्ण केल्याबद्दलही महापौरांनी त्यांचेही अभिनंदन केले आहे.

संपूर्ण गणेशोत्‍सवामध्‍ये मुंबईकरांच्‍या सेवेसाठी महानगरपालिका प्रशासनाने आवश्‍यक ती सर्व यंत्रणा उभी केली होती. ७० नैसर्गिक व १९९ कृत्रि‍म तलावांच्‍या ठिकाणी मूर्ती संकलन करुन विसर्जनाची व्‍यवस्‍था करण्‍यात आली होती. विविध चौपाट्यांवर ७८६ स्‍टील प्‍लेट लावण्‍यात आल्‍या होत्‍या. एकूण २३७ स्‍वागत कक्ष आण‍ि २१९ नियंत्रण कक्ष उभारले होते. ८१२ जीवरक्षक, १४२ मोटरबोट, १५४ प्रथमोपचार केंद्र, ८१ रुग्‍णवाहिका, १३० तात्‍पुरती शौचालये, ४२० निर्माल्‍य कलश, ३३८ निर्माल्‍य वाहन, ३ हजार ६५८ प्रखर झोताचे विद्युत दिवे, ३६३ सर्च लाईट, ४७ निरीक्षण मनोरे, ४३ जर्मन तराफा आदींचा त्‍यात समावेश होता. ठिकठिकाणी आवश्‍यकतेनुसार विद्युत तसेच संरक्षक कठडे यांची व्‍यवस्‍था करण्‍यात आली होती.

मूर्ती संकलन व विसर्जनानंतर, महानगरपालिकेच्या घनकचरा व्यवस्थापनाने सर्व स्थळांवरील निर्माल्य संकलित करण्याचे कामकाज त्‍वरेने पूर्ण केले. संपूर्ण श्री गणेशोत्‍सवात मिळून एकूण २ लाख ९९ हजार २७६ किलोग्रॅम इतके निर्माल्‍य संकलित करण्‍यात आले आहे. विविध ३४ ठिकाणी या निर्माल्‍यावर शास्‍त्रोक्‍त पद्धतीने प्रक्रियादेखील करण्‍यात आली आहे.

या संपूर्ण व्‍यवस्‍थेमध्‍ये महानगरपालिका प्रशासन तसेच बिगर शासकीय संस्‍था मिळून सुमारे १९ हजार ५०३ कामगारांचे हात राबत होते. तर ३ हजार ९६९ अधिकारी ही सारी व्‍यवस्‍था प्रशासकीय कामकाजासह सांभाळत होते.