मिठागर रोड येथील कोविड सेंटर मध्ये रुग्णांना पुन्हा अर्धवट शिजलेले जेवण व आंबलेला उपमाचे वाटप
- by Adarsh Maharashtra
- Sep 01, 2020
- 1853 views
मुलुंड(शेखर भोसले)मिठागर मुलुंड पूर्व येथील कोविड उपचार केंद्रात कोरोना रुग्णांना शिळे व अर्धवट शिजलेले अन्न मिळत असल्याची तक्रार तीनच दिवसांपूर्वी तेथील रुग्णांकडून करण्यात आली होती, हे प्रकरण ताजे असताना काल रात्रीच्या जेवणाच्या वेळी देखील कच्चे, अर्धवट शिजलेले अन्न येथील रुग्णांना देण्यात आल्याची तसेच आज सकाळच्या वेळी नाष्ट्याला देण्यात आलेला उपमाला देखील आंबल्याचा वास येत असल्याची तक्रार येथील रुग्णांनी केली आहे त्यामुळे टी वॉर्ड पालिका प्रशासनाने अन्न ठेकेदाराला तीन दिवसांपूर्वी देण्यात आलेल्या इशाराला ठेकेदाराने फाट्यावरच मारले असल्याचे चित्र दिसत आहे.
तीन दिवसांपूर्वी टी वॉर्ड प्रशासनाने अन्न पुरवठा ठेकेदाराला समज देवून पुन्हा तक्रार आल्यास कारवाई केली जाईल असा इशारा दिला होता परंतु या इशाराला कोणतीही भीक न घालता ठेकेदाराने मिठागर रोड कोविड सेंटरमधील रुग्णांना पुन्हा अर्धवट कच्चे जेवण काल रात्री दिल्याने येथील संतापलेल्या रुग्णांनी तेथील रात्रपाळीचे सुपरवायजर यांच्याकडे तक्रार केली तसेच संबंधित पालिका अधिकारी मेघारे यांच्याकडे फोनवर तक्रार केली तसेच कोणत्याही चेकिंगशिवाय रुग्णांना कच्चे अन्न गेल्या काही दिवसांपासून दिले जात असल्याने येथील रुग्णांनी काल जेवण न करता उपाशी झोपून पालिकेच्या टी वॉर्ड प्रशासनाविरुद्ध निषेध नोंदवला.अर्धवट कच्चे अन्न, व्यवस्थित न भाजलेली चपाती, कच्चा भात रुग्णांच्या ताटात वाढण्यात आल्याने तर आज सकाळी आंबलेला, वास येत असलेला उपमा नाश्त्याला दिल्याने रुग्णांनी संताप व्यक्त केला आहे.ठेकेदार नवल केरावाला यांच्याशी यासंदर्भात बोलणे केले असता त्यांनी चलाखीने काहीच माहिती नसल्याचे दाखवले व माहिती करून घेतो, बघतो असे सांगून फोन ठेवून दिला. पालिका अधिकारी मेघारे यांच्याशी संपर्क होवू शकला नाही. या कोविड सेंटरचे मुख्य व्यवस्थापक डॉ परदेशी यांनी आमचा कॅटरिंगशी संबंध येत नाही. रुग्ण तपासणी, औषधोपचार, इत्यादी सुविधा पुरवणे एवढेच आमचे काम आहे असे सांगितले.
परंतु गेल्या काही दिवसांपासून येथील रुग्णांना दिले जाणारे अर्धवट शिजलेले अन्न, आंबलेला, शिळा उपमा देवून कोविड रुग्णांच्या आरोग्याशी येथील व्यवस्थापन व पालिका प्रशासन खेळत असल्याचे समोर आले असून रुग्णांच्या सुविधेकडे दुर्लक्ष करून फक्त अधिकचा आर्थिक फायदा कसा कमवायचा याच उद्देशाने येथील ठेकेदार काम करत असल्याचे सातत्याने जाणवत असल्याचे मुलुंडच्या काही जागरूक नागरिकांनी सांगितले.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम