मुंबई : भारतरत्न लता मंगेशकर राहत असलेल्या मुंबईतील पेडर रोडवरील प्रभुकुंज इमारत मुंबई महापालिकेने सील केली आहे. सोसायटीत कोरोनाचा रुग्ण आढळल्याने खबरदारीचा उपाय म्हणून पालिकेने शनिवारी संध्याकाळी ही कारवाई केली आहे.

मुंबईतील पेडर रोडवरील प्रभुकुंज इमारतीत  गानसम्राज्ञी लता मंगेशकर, ज्येष्ठ संगीतकार हृदयनाथ मंगेशकर तसेच ज्येष्ठ गायिका उषा मंगेशकर यांचे वास्तव्य आहे. या इमारतीत इतरही वयस्कर व्यक्ती राहतात. त्यातच आता कोरोना विषाणूने या इमारतीत शिरकाव केल्याचे आढळले आहे. त्या पार्श्वभूमिवर मुंबई पालिकेने खबरदारी म्हणून प्रभुकुंज ही इमारत सील केली आहे. ही संपूर्ण सोसायटी सॅनिटाइज करण्यात येणार असून सोसायटी परिसरात औषध फवारणीही केली जाणार आहे.

दरम्यान, लता मंगेशकर यांनी एक पत्रक काढून याबाबतची माहिती दिली आहे. तसेच प्रभुकुंज सोसायटी बंद करण्यात आली आहे का? हे विचारण्यासाठी अनेकांचे फोन येत आहेत. सोसायटी आणि महापालिकेने वयस्कर लोकांच्या सुरक्षेच्या दृष्टीकोणातून ही इमारत सील करण्याचा निर्णय घेतला आहे, असे मंगेशकर यांनी निवेदनात म्हटले आहे.

कोरोना प्रादुर्भावाच्या पार्श्वभूमिवर सोसायटीत साधेपणानेच गणेशोत्सव साजरा केला जात आहे. मंगेशकर कुटुंबातील सर्वांची प्रकृती उत्तम आहे. त्यामुळे कुटुंबीयां बाबत कृपया कोणीही अफवा पसरवू नका.एक कुटुंब म्हणून सोसायटीतील सर्वजण करोनाबाबत सतर्क असून करोना रोखण्याबाबतच्या नियमांचे काटेकोरपालन करत आहेत. सोसायटीतील वयस्कर व्यक्तींना काहीही होऊ नये याची काळजी घेतली जात आहे. सध्या देवाच्या कृपेने आणि लोकांच्या आशीर्वादाने आमचे कुटुंब सुरक्षित आहे, अशीही माहिती लता मंगेशकर यांनी दिली आहे.