डोंबिवली :(श्रीराम कांदू)कल्याण-शिळ मार्गावर नेहमीची डोकेदुखी ठरत असलेल्या वाहतूक कोंडीवर जालीम उपाय काढण्या साठी सर्वतोपरी प्रयत्न सुरू करण्यात आले आहेत. या पार्श्वभूमीवर एमएसआरडीसी आणि वाहतूक नियंत्रण विभागाच्या वरिष्ठ पोलिस अधिकाऱ्यांसह खासदार डॉ. श्रीकांत शिंदे कल्याण-शिळफाटा ते भिवंडी या संपूर्ण रस्त्याची बुधवारी पाहणी केली. या दौऱ्यादरम्यान कल्याण-शिळ रस्त्यावरील वाहतूक कोंडी फोडण्यासाठी उपाययोजना अंमलात आणण्यात येणार असल्याचे उपस्थित अधिकाऱ्यांनी सांगितले.

कल्याण-शिळ रस्त्यावर होणारी वाहतूक कोंडी आणि त्यामुळे नागरिकांना होत असलेला त्रास यांची दखल घेत बुधवारी महाराष्ट्र राज्य रस्ते विकास महामंडळाचे (एमएसआरडीसी)उपाध्यक्ष व व्यवस्थापकीय संचालक राधेश्याम मोपलवार आणि वाहतूक विभागाचे उपायुक्त अमित काळे यांच्या समवेत खासदार डॉ. श्रीकांत शिंदे यांनी कल्याण-शिळ रस्त्याची पाहणी केली. या दौऱ्यादरम्यान भविष्यात वाहतूक कोंडींच्या समस्येपासून नागरिकांची कायमस्वरुपी मुक्तता व्हावी, या दृष्टिकोनातून कल्याण-शिळफाटा ते भिवंडी रस्त्याचे सहापदरी रुंदीकरणाचे काम सुरु असून लॉकडाऊनच्या काळात कामगार नसल्याकारणामुळे सदर काम संथगतीने सुरु होते. वाहतूक कोंडीच्या पार्श्वभूमीवर या रस्त्याची पाहणी करताना रस्त्यावरील खड्डे तातडीने बुजवण्याच्या सुचना मोपलवार यांना केल्या.रस्त्यावरील खड्डयांमुळे जंक्शन परिसरातील वाहतूक कोंडी मोठ्या प्रमाणात होते.

पावसाळ्यातील पाण्यामुळे रस्त्यावर डांबर टिकत नसल्यामुळे सदर ठिकाणी पेव्हर ब्लॉकचा वापर करून खड्डे बुजविण्यात यावेत. तसेच या महामार्गा वरील मध्यम क्षेत्र (Median) साठी आरक्षित असलेली जागा रहदारीकरिता वापरल्यास वाहतूकीसाठी अतिरिक्त जागा उपलब्ध होऊ शकते. त्यामुळे सदर जागा मोकळी करुन पेव्हर ब्लॉक टाकून वाहतूकीसाठी उपलब्ध करावी, अशा सुचना यावेळी केल्या. या रस्त्यावर अनेक ठिकाणी रोड एंट्री एक्झिट पॉईंट्स असून अति महत्वाचे एंट्री एक्झिट पॉईंट्स सोडून इतर सर्व मार्ग तात्पुरते बंद करण्याच्या सुचना वाहतूक विभाग उपायुक्त काळे यांना केल्या आहेत. वाहतूक कोंडी होऊ नये, यासाठी सदर सर्व पर्यायांची तातडीने अंमलबजावणी करावी, अशा सुचना देखील या पाहणी दौऱ्यादरम्यान केल्या.