मुंबई (महेश्वर तेटांबे)  : कोरोनामुळे मार्च,  एप्रिल, मे हा उत्सव , जत्रा - यात्रा , विवाह सोहळ्याचा सिझन मराठी वाद्यवृंदातील लोककलाकार कार्यक्रमापासून पूर्ण पणे वंचित राहिले होते. पावसाळ्यात  मुंगी प्रमाणे  साठवलेला कणान् कण काढुन गुजराण करणा-या कलाकारांच्या भाळी दहिहंडी , स्वतंत्र दिन व गणेशोत्सव सुध्दा घरी बसुन  काढणे आले आहे. परिस्थिती बिकट असतानाही त्यावर आसवं न गाळता स्वतःची दुखः बाजूला सारत जो दुस-याला आनंद  देतो तो कलाकार म्हणून मराठी व्यावसायिक वाद्यवृंद निर्मिता संघ व कलानिधी समिती या संस्थेच्या विद्यमाने एक अनोखी दहिहंडी साजरी होणार आहे. लाॅकडाऊन ही पर्यावरण संवर्धनाची उत्तम संधी असल्यामुळे बुधवार दिनांक १२ ऑगस्ट २०२० रोजी वाद्यवृंदतील मराठी कलाकार ज्येष्ठ वृक्षतज्ञ श्री विक्रम यंदेजींच्या मार्गदर्शनाखाली दिर्घ काळ टिकणारी डेरेदार सावली देणा-या भारतीय  प्रजातीच्या वृक्षांचे एकाच वेळी  एकाच दिवशी पंचवीस ठिकाणी वृक्षारोपण  करण्यात येणार आहे . यासाठी विविध  विभागात २५ टिम केल्या जाणार आहेत त्यांच्या माध्यमातून सकाळी ९ ते १२ या वेळेत तब्बल १००० वृक्ष संपूर्ण मुंबई व उपनगरात लावले जाणार आहे.

या उपक्रमाचा पूर्व द्रुतगती मार्गावरील  विक्रोळी गोदरेज गेट येथे सकाळी शुभारंभ होईल. त्या नंतरचा टप्पा असेल तो म्हणजे सागरी किना-याची स्वच्छता त्याच दिवशी दुपारी नंतर हे सर्व कलाकार मुंबई व उपनगरा लगत परिसरातील समुद्र किना-यावर तब्बल आठ ठिकाणी साफ-सफाई मोहीम राबविण्यात येणार आहे. शनिवार, दिनांक १५ ऑगस्ट २०२० रोजी कोरोनामुळे बेरोजगार झालेल्या वाद्यवृंद कलाकारांच्या घरोघरी गणेशोत्सवातून आनंद देता यावा सहाय्य व्हावे याकरिता मिष्टान्न तयार करता येतील अशी अन्नधान्याची पाकिटे उपरोक्त संस्थेच्या माध्यमातून वाटण्यात येणार आहेत. दि.१५ ऑगस्ट रोजी आपण सर्वच डौलाने राष्ट्रध्वज किंवा बिल्ले मिरवतो पण दुस-या दिवशी अनेकदा

रस्त्यावर पडलेले आढळतात. रविवार, दिनांक १६ ऑगस्ट रोजी संस्थेतील स्वयंसेवक  असे राष्ट्रध्वज व बिल्ले शोधून त्याचं संकलन व योग्य  सन्मान करणार आहेत. यंदा गणेशोत्सव साधेपणाने साजरा होत असल्याने कोणत्या प्रकारचे अवधान मंडळाच्या पदाधिकारी व कार्यकर्ते यांनी राखायचे यासाठी हे सर्व कलाकार सामाजिक अंतर राखून दिलेल्या नियमांचे पालन करत गणेशोत्सव मंडपात जाऊन प्रबोधन करणार आहे व माहिती  देणार आहेत. पर्यावरण व सामाजिक बांधिलकी जपत एक अनोख्या पध्दतीने  मराठी सणासुदीला साजरं करणं हा बहुउद्देश या संस्थेचा आहे.