डोंबिवली :(श्रीराम कांदू)कल्याण-कसारा रेल्वे मार्गावरील आंबिवली पश्चिमच्या महावितरणची सडलेल्या विद्युत खांबाने पोलखोल करून टाकली. महावितरणचा भोंगळ कारभार तसेच निष्काळजीपणा यामुळे ऐन पावसाळ्यात या रस्त्याच्या दुतर्फा असलेले विद्युत खांब सडले असून आडवे झाल्याने या भागात तब्बल 7 ते 8 तास बत्ती गुल झाली होती.

मंगळवारी पहाटे 3 वाजण्याच्या सुमारास वडवली मेन रोडवर विद्युत खांब रस्त्यावर आडवे झाले. त्यानंतर पूर्ण आंबिवली पश्चिमेकडील वडवली गाव, आंबिवली स्टेशन परिसर, अटाळी गाव, आंबिवली गावठाण परिसरात विद्युत पुरवठा खंडित झाला. सकाळपासून वडवली रस्त्यावरची वाहतुक बंद करण्यात आली होती. या रस्त्याच्या कडेला असलेला विद्युत खांब सडल्यामुळे रस्त्यावर कोसळला. ही माहिती कळताच महावितरणच्या अधिकाऱ्यांसह कर्मचाऱ्यांनी सदर खांब हटवून प्रथम रस्ता मोकळा केला. त्यानंतर त्याजागी नवीन खांब टाकण्याचे काम सुरू केले. खंडीत झालेला विद्युत पुरवठा दुपारनंतर पूर्ववत करण्यात आला. विशेष जेव्हा हा खांब पडला ती पहाटेची वेळ होती. त्यामुळे कोणतीही जीवितहानी झाली नाही. विद्युत खांब कुजेपर्यंत महावितरण कंपनी झोपली होती का ? असा प्रश्न या भागातील ग्रामस्थ, रहिवासी, पादचारी, वाहन चालक विचारत होते. झालेल्या या प्रकारासाठी आम्ही महावितरणचा निषेध करतो आणि भविष्यात पुन्हा अशी घटना होऊ नये म्हणून महावितरणला लेखी निवेदन देऊन जागरुक करतो. महावितरणने हा भोंगळ कारभार थांबवावा आणि पुन्हा विजेचे अशा तऱ्हेने लॉकडाऊन होणार नाही याची दक्षता घ्यावी, अशी मागणी या भागातील जागरूक तरूण रमण तरे यांनी केली आहे.