मुंबई (ओंमकार शिरवडकर) महापालिका बी विभागाच्या हद्दीत येणाऱ्या सामंतभाई नानजी मार्ग,मुंबई ४००००९ या ठिकाणी एैतिहासिक अशी ब्रिटिशकालीन डोंगरी जेल नामक प्रशस्त वास्तू आहे. सद्या सदर वास्तूचा वापर बाल सुधार केंद्र म्हणून केला जात आहे. ब्रिटिश काळात ह्या एैतिहासिक वास्तूत कित्येक ज्ञात-अज्ञात असे स्वातंत्र्य सेनानी तुरुंगवास सोसत होते,तर कित्येक जण याठिकाणी फासावर चढले.थोर सेनानींच्या पदस्पर्शाने आणि हौतात्म्याने पावन असणारी अशी ही एैतिहासिक वास्तू आहे. सदर वास्तूची सद्या बरीच दुरावस्था झाली आहे. एैतिहासिक असणारा हा वारसा भावी पिढीला आदर्शवत वाटावा याकरता ह्या वास्तूचे संवर्धन व नूतनीकरण होणे ही काळाची गरज आहे,असे मत बृहन्मुंबई पोलीस आयुक्त पुरस्काराने सन्मानित दीपक शिरवडकर आणि दैनिक आदर्श महाराष्ट्राचे संपादक रघुनाथ ढेकळे यांनी व्यक्त केले

विशेष म्हणजे ह्या एैतिहासिक वास्तूत असंतोषाचे जनक लोकमान्य टिळक आणि आगरकर हे काही काळ तुरुंगवास सोसत होते.त्यांनी ज्या कोठडीत तुरुंगवास भोगला ती वास्तू आजही याठिकाणी इतिहासाची साक्ष देत आहे. त्या वास्तूचा इतिहास जागृक राहणे महत्त्वाचे आहे. कारण भारतीय स्वातंत्र्याची नाळ ह्या वास्तूत रुजलेली आहे.

महाराष्ट्राचे तत्कालीन मुख्यमंत्री पै.बँरिस्टर ए.आर.अंतुलेसाहेब यांनी त्यांच्या मुख्यमंत्री पदाच्या कारकिर्दीत अंदाजे एक कोटी रुपयांचा निधी सदर एैतिहासिक वास्तूचा नूतनीकरणाकरता दिला होता. समाजकल्याण विभागाच्या अखत्यारीत हा निधी त्यावेळी दिला गेला होता. परंतु त्या निधीचे प्रत्यक्षात काय झाले ही बाब गुलदस्त्याच आहे. या गोष्टीस आता बराच काळ लोटून गेला आहे. विद्यमान परिस्थितीत ह्या एैतिहासिक वास्तूचे जतन होणे महत्त्वाचे आहे. तसेच या वास्तूत स्वातंत्र्य संग्रामाचा चालता बोलता दृकश्राव्य इतिहास भावी पिढीसमोर आणला जाणे हे आपणा सर्वांचे कर्तव्य आहे.असे मत दीपक शिरवडकर यांनी व्यक्त केले.राज्याचे मुख्यमंत्री उध्दवजी ठाकरे यांनी सदर वास्तूच्या नूतनीकरण आणि संवर्धनाकरता योग्य ते आराखडे तयार करून त्याकरता लागणारा निधी महाराष्ट्र शासनाकडून उपलब्ध करून ध्यावा अशी इच्छा दीपक शिरवडकर  यांनी प्रतिनिधीकडे व्यक्त केली.