मुलुंड :(शेखर चंद्रकांत भोसले) उषा सदन, अशोकनगर, कांजूरमार्ग येथील कृपासागर एंटरप्रायझेसचे स्वप्नील हुलाले हा युवक इंटरनेटची केबल टाकत असता वरून जाणाऱ्या टाटा पॉवरच्या हाय वोल्टेज विद्युत लाईनशी या इंटरनेटच्या केबलचा संपर्क झाल्याने तेथे मोठा स्फोट झाल्याची घटना घडली. या दुर्घटनेत स्वप्नील हुलाले हा युवक ४० टक्के भाजला असून त्याला सायन येथील लोकमान्य टिळक रुग्णालयात उपचारासाठी दाखल करण्यात आले आहे. तेथे त्यांची प्रकृती स्थिर असून उपचाराला योग्य साथ देत असल्याने कोणताही धोका नसल्याचे डॉक्टरांनी सांगितले. या दुर्घटनेत मोठा स्फोट झाल्याने, त्या परिसरात राहणाऱ्या किसन गोडसे, प्रशांत रमेश भोसले व आजुबाजूच्या इतर सात जणांच्या घराचे पत्रे उडून गेले आहेत. घरातील लाइट्स व विजेच्या केबल जळून खाक झाल्या असून इतर विद्युत उपकरणे जसे की टी व्ही, फ्रीज, कॉम्पुटर, एसी, इ. उपकरणांचे मोठे नुकसान झाले.या घटनेची माहिती मिळताच विक्रोळी विधानसभेचे  आमदार सुनिल राऊत यांनी तातडीने घटनास्थळी धाव घेवून स्वतः त्या परिसराची पाहणी केली व आवश्यक त्या हालचाली चालू केल्या. आमदारांनी ताबडतोब टाटा वीज पॉवरच्या अधिकाऱ्यांना बोलावून घेतले तसेच सदर घटनेची गंभीरता लक्षात घेऊन पोलिस प्रशासनाला घटना स्थळी बोलावून घटनेचा पंचनामा करायला सांगितले आणि पिडीतांना योग्य ते सहकार्य करण्याची विनंती केली तसेच लोकमान्य टिळक रुग्णालयात दाखल असलेल्या जखमी स्वप्नील हुलाले यांच्याशी बोलून त्याच्या तब्येतीची विचारपूस केली आणि रुग्णालय प्रशासनास रुग्णाची काळजी घेवून योग्य ते औषधोपचार करण्याची विनंती केली. 

भर पावसाळ्यात आपल्या मतदारसंघातील नागरिकांच्या घरावरील छप्पर चुकून झालेल्या अपघाताने उडाल्याने, या नागरिकांचे संसार छप्परविना पावसाळ्यात भिजू नये यासाठी त्यांच्या घरावर आमदार सुनिल राऊत यांनी स्वखर्चाने ताबडतोब पत्रे घालून देण्यास सुरुवात केली आहे.