मुलुंड :(शेखर चंद्रकांत भोसले) भाजपाचे प्रदेशाध्यक्ष चंद्रकांत पाटील यांनी शुक्रवार दि ३ जुलै रोजी प्रदेश पदाधिकारी व प्रदेश कार्यकारिणीची घोषणा केली असून यात मुलुंडचे आमदार मिहिर कोटेचा यांची कोषाध्यक्ष म्हणून नेमणूक करण्यात आली. मुलुंडच्या विकासासाठी सातत्याने काम करणाऱ्या व मुलुंडकरांच्या सर्व समस्या सोडविण्यासाठी पुढाकार घेणाऱ्या आमदार मिहीर कोटेचा यांना महाराष्ट्र प्रदेश कार्यकारिणीचे कोषाध्यक्ष पद देवून महाराष्ट्र भाजपातर्फे त्यांच्या कार्याचा गौरव करण्यात आला आहे, अशी प्रतिक्रिया स्थानिक भाजपा कार्यकर्त्यांनी व्यक्त केली आहे. ईशान्य मुंबईचे खासदार मनोज कोटक, माजी आमदार व भाजपाचे वरिष्ठ नेते प्रकाश मेहता तसेच सर्व नगरसेवक, स्थानिक पदाधिकारी व कार्यकर्त्यांनी मिहीर कोटेचा यांना प्रत्यक्ष भेटून त्यांचे यानिमित्ताने अभिनंदन केले. 

                 अल्प परिचय: 

सुमारे २० वर्षांपूर्वी वडील चंद्रकांत कोटेचा यांच्याबरोबरीने आमदार मिहीर कोटेचा यांनी आपल्या राजकीय कारकिर्दीला सुरुवात केली. उत्तम संघटक आणि नेतृत्वगुण असलेल्या मिहीर कोटेचा यांनी २००८ ते २०१० या कालावधीत भाजयुमोच्या मुंबईचे अध्यक्षपद भुषविले. त्यांच्या नेतृत्वाखाली २००८ साली मुंबईत झालेल्या बॉम्ब ब्लास्टच्या विरोधात मुंबई भाजपाच्या युवा विंगने बोरिवली ते मुलुंड अशी ७ दिवसांची १२० किमीची भव्य पदयात्रा काढली होती. तसेच ''यूथ अगेन्स्ट टेरोरीझम'' हे ब्रीदवाक्य घेवून बोरिवली आणि मुलुंड ते गेटवे ऑफ इंडिया पर्यंत मोटरसायकल रेली काढली होती. २६ जानेवारी २०११ रोजी भारतीय प्रजासत्ताक दिनी श्रीनगर येथे भारतीय ध्वज फडकविल्या प्रकरणी मिहीर कोटेचा यांना अटक करण्यात आली होती.

२०१४ साली झालेल्या विधानसभा निवडणुकीत वडाळा येथून भाजपातर्फे पहिल्यांदा विधानसभा निवडणूक लढताना आमदार कालिदास कोळंबकर यांच्या विरुध्द त्यांना अल्पशा मतांनी पराभव पत्करावा लागला होता परंतु याने नाऊमेद न होता अधिक जोमाने राजकीय व सामाजिक कार्ये करत त्यांनी २०१९ साली मुलुंड येथून विधानसभा निवडणूक लढवून मोठ्या फरकाने प्रतिस्पर्ध्यावर विजय मिळविला.