मुंबई दि.17 ( जीवन तांबे )चेंबूर येथील एम पश्चिम विभागातील सफाई कामगार कोरोनाच्या काळात आपल्या जीवाची पर्वा न करता लढत  आहे. परन्तु या कामगाराना पालीका प्रशासन कोणतीही सुविधा पुरवीत नसल्याच्या निषर्धात आज पालिका म्युनिसिपल मजदूर युनियनच्या वतीने पालिका एम पश्चिम कार्यालया समोर आंदोलन करण्यात आले.

एम पश्चिम विभागातील सफाई कामगार कोरोनाच्या लढ्यात मुंबईची साफसफाई करीत आहेत. या कामगाराना झोपडपट्टीतील शौचालये ही साफ करावे लागते. त्यामुळे नागरिकांचा थेट संपर्क येत असल्याने कोरोनाचा संसर्ग होतो. त्यामुळे कित्येक कामगार कोरोनाला बळी पडले आहेत.

यावेळी कामगारांकडून आंदोलनादरम्यान विविध मागण्या करण्यात आल्या. पालिकेच्या सफाई खात्यातील मृत, सेवानिवृत्त व वैद्यकीय असमर्थ कामगारांचे पेन्शन, उपदान, भविष्य निर्वाह निधी व वारसांना नोकरी हे प्रश्न निकाली काढण्यात यावेत. कामगारांच्या रजा, प्रवास भत्ता तसेच फंडाच्या पावतीवर वारसांची नावे या कामांकडे दुर्लक्ष केले जात आहे. कामगारांचे विविध अर्ज लिपिकांकडून हरवले गेले असून कामगारांच्या हक्काच्या रजा देखील कापल्या जात आहेत. कामगारांना लागणारे एन ९५मास्क, सॅनिटायझर, साबण, टॉवेल व गणवेश या वस्तू वेळेवर व नियमित देण्यात याव्यात. रिलायन्सने दिलेले 1500 रुपयांचे कूपन काही कामगारांना मिळाले नाही ते देण्यात यावेत.   स्वच्छता कर्मचाऱ्यास बारा वर्षे पूर्ण झाली असल्यास त्या कामगारास कालबद्ध पदोन्नती म्हणून मुकादम वेतन देण्यात यावे. राखीव कामगार व मुकादम यांना रिक्त झालेल्या जागांमध्ये भरती करण्यात यावे. स्वच्छता कर्मचारी आपल्या अडचणी वरिष्ठांना सांगण्यास गेले असता त्यांना चांगली वागणूक देण्यात यावी. 

म्युन्सीपल  मजदूर युनियनच्या वतीने पालिका कार्यालयासमोर  पालिका प्रशासनाचा निषेध करण्यात आला. यावेळी संदीप काशिनाथ मोते  शक्तीवेल कलवण, प्रवीण पवार, प्रवीण घोगरे, अमित जाधव, शोभा जाधव, साधना गायकवाड, विनोद जाधव तसेच मुकादम,कामगार मोठ्या प्रमाणात उपस्थित होते