मुलुंड :(शेखर चंद्रकांत भोसले)मुलुंड मधील अनेक शाळांनी ऑनलाईन शिक्षणाला सुरुवात केली असून काही शाळांमधून शैक्षणिक वर्ष २०२०-२१ ला मंगळवार दि १६ जून पासून ऑनलाईन शिक्षणाला सुरुवात होत आहे. लॉकडाऊन संपेपर्यंत कोणत्याही शाळेने पालकांना फी भरण्याची सक्ती करु नये तसेच या शैक्षणिक वर्षात शाळेच्या फी मध्ये देखील वाढ करु नये असे स्पष्ट आदेश सरकारने दिलेले असतानाही मुलुंडमधील काही शाळा पालकांना फी भरण्याची जबरदस्ती करत असल्याचे आढळून आले असून या शाळांनी फी मध्ये देखील वाढ केल्याचे दिसून आल्याने संतप्त पालकांनी मुलुंड आमदार, खासदार यांच्याकडे आपली गार्हाणी मांडून या प्रश्नात लक्ष घालण्याची विनंती केली आहे. 

मुलुंड पश्चिमेला असलेल्या एनईएस नेशनल पब्लिक स्कूलने शासनाच्या आदेशाला धुडकावून विद्यार्थ्यांच्या पालकांकडे शाळेची फी भरण्याची मागणी केली असून या शाळेने या शैक्षणिक वर्षासाठीच्या फी मध्ये देखील वाढ केल्याने पालकांनी एकत्र येवून ईशान्य मुंबईचे खासदार मनोज कोटक यांना सविस्तरपणे तक्रार केली. खासदार मनोज कोटक यांनी तातडीने या प्रश्नात लक्ष घालून पालक व शाळेच्या व्यवस्थापनाशी चर्चा करण्यासाठी झूम मीटिंगचे आयोजन केले. दोन्ही बाजू ऐकून घेतल्यानंतर खासदार मनोज कोटक यांनी शाळा व्यवस्थापनाला विद्यार्थ्यांच्या पालकांकडून अतिरिक्त फी न घेता फक्त ट्युशन फी घेण्याचे आदेश दिले. त्यानुसार एनईएस नेशनल पब्लिक स्कूलच्या व्यवस्थापनाने मनोज कोटक यांच्या आदेशाचे पालन करुन पालकांकडून फक्त ट्युशन फी घेण्याचे ठरविले आहे. 

शाळेच्या या निर्णयामुळे खूष झालेल्या पालकांनी शाळा व्यवस्थापन आणि खासदार मनोज कोटक यांचे विशेष आभार मानले आहे. खासदार मनोज कोटक यांनी आपला बहुमुल्य वेळ देवून या प्रश्नी लक्ष घालून शाळेने वाढवलेली अतिरिक्त फी कमी करुन दिल्याबद्दल एनईएस शाळेच्या पालकांनी एक पत्रक काढले असून या पत्रकात खासदार मनोज कोटक यांच्याबद्दल गौरवोद्गार काढले आहेत तसेच त्यांचे आभार व्यक्त केले आहेत.