मुलुंड :(शेखर चंद्रकांत भोसले) कोरोनाच्या  विषाणूचा फैलाव होवू नये यासाठी कोरोना बाधित मृतदेह गॅसवाहिनी किंवा विद्युत वाहिनीत दहन केले जातात. परंतु मुलुंड पश्चिम येथील आर. पी. रोड येथील स्मशान भूमीतील डिझेल दाहिनी गेल्या २० दिवसां पासून बंद असल्याने मुलुंडमधील कोरोना बाधित मृतदेहांना भांडूपमधील स्मशानभूमीत नेवून तेथेच दहन करावे लागत आहे. परिणामी मृतांच्या नातेवाईकांना टी वार्ड पालिका प्रशासनाच्या गलस्थान कारभारामुळे नाहक त्रास सहन करावा लागत आहे.  

मुलुंड पूर्व येथील टाटा कॉलनीतील स्मशानभूमीत विद्युतदाहीनी बसवण्याची पालिकेची योजना आहे परंतु गेल्या दोन वर्षापासून या कामाला कोणतीही गती आली नसल्यामुळे हा प्रस्ताव अद्याप बासनात गुंडाळून ठेवला आहे. तसेच मुलुंड पश्चिम येथील डंपिंग रोडवरील मुलुंड नागरिक सभा संचालित स्मशानभूमीचे नूतनीकरणाचे काम अत्यंत धीम्या गतीने गेल्या कित्येक दिवसां पासून चालू आहे. या नूतनी करणा अंतर्गत येथे विद्युतदाहिनी बसवण्यात येणार होती परंतु एकंदरच धीमे काम, कंत्राटदाराची उदासीनता व पालिका अधिकाऱ्यांचा हलगर्जीपणा त्यातच कोरोनामुळे निर्माण झालेली लॉकडाऊनची परिस्थिती यामुळे येथे विद्युतदाहीनी बसवायचे काम सुरूच झाले नाही आहे. त्यामुळे आर. पी. रोडवरील स्मशानभूमीतील डिझेल दाहीनीत सध्या सर्व कोरोनाबाधित मृतदेह नेले जात होते परंतु ही डिझेल दाहीनीही गेल्या २० दिवसांपासून दूरूस्तावस्थेत असल्याने मुलुंडमधील मृतदेहांना भांडूप येथील स्मशानभूमीत नेवून अंत्यसंस्कार करावे लागत आहे. त्यामुळे मृतांच्या नातेवाईकांना अधिकची पायपीट करावी लागत आहे. स्मशान भूमीच्या व्यवस्थापनाची जबाबदारी मुलुंड नागरिक सभा ह्या सामाजिक संस्थेकडे असून त्यांच्या पदाधिकाऱ्यांशी यासंदर्भात संपर्क साधला असता त्यांनी सांगितले कि या डिझेल दाहिनीचा दरवाजा नादुरुस्त झाला असून त्याच्या दुरुस्तीसाठी निविदा काढण्यात आली आहे आणि येत्या २० दिवसांत दरवाजा दुरुस्त होवून ही डिझेल दाहिनी पुन्हा कार्यरत होईल. 

पालिका अधिकारी प्रकाश गाड यांच्याशी यासंदर्भात संपर्क साधला असता त्यांनी सांगितले कि आर. पी. रोडवरील स्मशानभूमीच्या व्यवस्थापनाची जबाबदारी मुलुंड नागरिक सभेकडे असल्याने तेथील

डिझेल दाहिनी दुरुस्तीचे काम त्यांच्यामार्फत करण्यात येत आहे. लवकरच ही डिझेल दाहिनी दुरुस्त होईल आणि नंतर कोरोनाबाधित मृतदेह भांडूपला नेण्याची आवश्यकता पडणार नाही. तसेच मुलुंड पूर्व येथील टाटा कॉलनीतील विद्युत दाहीनी बसवायचा प्रस्ताव पुढे पाठवला असून वरिष्ठ पातळीवर त्यावर चर्चा चालू आहे. कोरोनामुळे थोडा विलंब होत आहे, असे पालिका अधिकारी प्रकाश गाड यांनी पुढे सांगितले.