मुंबई : गेल्या काही दिवसांपासून कोरोना बाधित रुग्णांचे मृतदेह रुग्णालयातून गायब होण्याचे प्रकार वाढले आहेत ही अत्यंत चिंतेची बाब आहे. कांदिवली येथील शताब्दी रुग्णालयातून ८० वर्षीय ज्येष्ठ व्यक्ती गायब होणे आणि तिचा मृतदेह हा बोरिवली स्थानकाच्या बाहेर सापडणे, याला काय म्हणावे? गेल्या काही दिवसांत मुंबईत अशा मृतदेह गायब होण्याच्या ६ घटना घडल्या आहेत, राज्यात हे काय सुरु आहे, असा सवाल भाजपाचे प्रदेश उपाध्यक्ष किरीट सोमैया यांनी उपस्थित केला आहे.

 याबाबत त्यांनी राज्याचे आरोग्यमंत्री राजेश टोपे आणि गृहमंत्री अनिल देशमुख यांच्याकडे पत्राद्वारे कारवाई कऱण्याची विनंती केली आहे.

 ते म्हणाले की, मुंबईत महापालिकेच्या सर्वच रुग्णालयातील व्यवस्थापन आणि यंत्रणा सध्या कोलमडली आहे. जे रुग्ण मृत होत आहेत, त्यांचे रेकॉर्ड ठेवले जातेय की नाही, असा प्रश्न निर्माण झाला आहे. कोरोनासारखं एवढं मोठं सकंट मुंबईवर असताना, मृतांच्या नातेवाईकांच्या भावनांचा विचार केला जात नाही. एकतर आपला रुग्ण हा कोरोनामुळे दगावला आहे हे सत्य मान्य करतानाच नातेवाईकांसाठी आपल्या जवळच्या व्यक्तिचे अंतिम दर्शनही घ्यायला न मिळणे किंवा मृतदेहच गायब होणे हे धक्कादायक आहे.

मृतदेह गायब होण्याच्या मुंबईतल्या घटना

· सुधाकर खाडे - रा. चिंचपोकळी, केईएम रुग्णालय

· मेहराज शेख - रा. गोवंडी, घाटकोपर राजावाडी हॉस्पिटल

· विठ्ठल मुळ्ये -रा मालाड, कांदिवली शताब्दी हॉस्पिटल

· मधुकर पवार - रा. वरळी, वरळी NSCI / नायर रुग्णालय

· ग्यांतीदेवी विश्वकर्मा - रा. कांदिवली बीकेसी /सायन रुग्णालय

. राकेश वर्मा - रा. वडाळा, बाळासाहेब ठाकरे ट्रामा रुग्णालय, जोगेश्र्वरी