मुंबई, ५ जून:- बुधवारी महाराष्ट्राला बसलेल्या ‘निसर्ग चक्रीवादळा’च्या तडाख्यामुळे रायगड जिल्ह्यातील अनेक तालुक्यांचे प्रचंड नुकसान झाले. या पार्श्वभूमीवर तातडीची मदत म्हणून रायगड जिल्ह्यासाठी १०० कोटीचा निधी मुख्यमंत्री उद्धव ठाकरे यांनी जाहीर केला आहे. वादळात झालेल्या नुकसानीचा आढावा घेण्यासाठी मुख्यमंत्री आज रायगड जिल्ह्याच्या दौऱ्यावर होते. यावेळी त्यांनी अलिबागचा दौरा करत नुकसानग्रस्त भागाची पाहणी केली. त्यामुळे तूर्तास तातडीची मदत म्हणून हा निधी जाहीर करण्यात आला असल्याचं मुख्यमंत्री उध्दव ठाकरे म्हणाले.

मुख्यमंत्री उद्धव बाळासाहेब ठाकरे यांनी आज रायगड जिल्ह्यातील अलिबाग तालुक्यातील थळ येथे निसर्ग चक्री वादळामुळे झालेल्या नुकसानीची पाहणी केली. यावेळी पालकमंत्री आदिती ठाकरे यांनी मुख्यमंत्र्यांना नुकसानीची माहिती दिली.

यावर अधिक महिती देत उध्दव ठाकरे मुख्यमंत्री म्हणाले, आपण कोणतंही भलंमोठं आर्थिक पॅकेज जाहीर करणार नाही सद्यस्थितीत रायगड जिल्ह्यासाठी तातडीची मदत व्हावी यासाठी १०० कोटींचा निधी दिला जात आहे. तसंच नुकसानीचे पंचनामे केले जात असून त्याला आणखी ४ ते ५ दिवस लागतील. त्यानंतर नुकसान भरपाई दिली जाईल. निसर्ग चक्रीवादळामुळे इथल्या अनेक घरांचं नुकसान झालं.विजेचे खांब पडले. त्यामुळे खंडित झालेला वीजपुरवठा पुन्हा सुरू करण्यात यावा, अशी सूचना देण्यात आली असल्याचं मुख्यमंत्री ठाकरे म्हणाले.

                   ठळकमुद्दे

निसर्ग चक्रीवादळाचा अनुभव रायगडकरांनी प्रत्यक्षात घेतला.

कोकणवासीय भीषण तांडवाला तोंड देत होते.

जीवितहानी टाळण्यास प्रशासन यशस्वी

रायगडसाठी १०० कोटीचा निधी देतोय

नुकसानीच्या पंचनाम्यांना ४ ते ६ दिवस लागतील

वादळाचे संकट गेलं तरी कोरोनाचं संकट कायम आहे.

प्रशासन सतर्क आहे.