भांडूपमध्ये राज्य राखीव पोलिस दलाची तुकडी तैनात; मुलुंडमध्येही लवकरच होणार दाखल
- by Adarsh Maharashtra
- May 29, 2020
- 725 views
मुलुंड :(शेखर चंद्रकांत भोसले) भांडूपमध्ये कोरोनाबाधित रुग्णांचा आकडा झपाट्याने वाढत असल्याने अनेकवेळा पालिकेच्या एस वार्ड अधिकाऱ्यांनी पोलिसांच्या सहाय्याने लॉकडाऊनची कडक अंमलबजावणी करण्याचा प्रयत्न केला तरीही रस्त्यावर कामाशिवाय येणाऱ्या नागरिकांचे विशेषतः युवा पिढीचे प्रमाण कमीच होत नसल्याने भांडूपमधील रस्त्यावरील गर्दी कमीच होत नाही आहे तसेच सोशल डिस्टेन्स देखील राखले जात नाही आहे यामुळेच भांडूप, पवई व विक्रोळीचा समावेश असलेल्या एस वार्डात कोरोनाच्या रुग्णसंख्येने १३५० चा आकडा पार केला आहे. भांडूपमधील बेशिस्त लोकांना धडा शिकविण्यासाठी व येथील कोरोनाचा फैलाव रोखण्यासाठी शासनाने राज्य राखीव पोलिस दलाच्या तुकड्या तैनात केल्या असून या तुकड्या आता विनाकारण रस्त्यावर फिरणाऱ्या नागरिकांना आवर घालणार आहे. सोमवारी या तुकडीने रस्त्यावर पदसंचलन करुन नागरिकांना घराबाहेर न पडण्याचे आवाहन केले.
तसेच मुलुंडमध्येही कोरोना रुग्ण संख्येचा आकडा ६६७ वर पोहचल्याने येथेही राज्य राखीव दलाच्या तुकड्या तैनात करण्याचा प्रशासन गांभिर्याने विचार करत असल्याचे सूत्रांकडून मिळालेल्या माहितीनुसार समजले. मुलुंडमधील पूर्व, पश्चिम येथील झोपडपट्ट्या व काही इमारतीत मोठ्या संख्येने रुग्ण गेल्या काही दिवसांत आढळून आले आहे. प्रशासनाने ५५ वयापेक्षा अधिक वय असलेल्या पोलिसांना सुट्ट्या दिल्या असल्याने पोलिस कर्मचाऱ्यांची संख्या कमी पडत आहे तसेच सातत्याने कराव्या लागलेल्या ड्यूटीमुळे पोलिस देखील दमले आहेत त्यामुळे पोलिसांवर कायदा व सुव्यवस्था राखताना आलेला प्रचंड ताण हलका करण्यासाठी राज्य राखीव दलाच्या तुकड्या तैनात करण्याचा विचार प्रशासन करीत असल्याचे सूत्रांनी सांगितले. राज्य राखीव दलाच्या तुकड्या मुलुंडमध्ये दाखल झाल्यावर मुलुंड पोलिसांवरील ताण देखील काही प्रमाणात हलका होईल तसेच विनाकारण बाहेर फिरणाऱ्या नागरिकांना चाप बसून कोरोनाचा वाढता फैलाव रोखणे शक्य होईल असे प्रशासनाला वाटत आहे.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम