मुंबई ( जीवन तांबे ) कोरोनाने देशभर थैमान घातले असताना लॉकडॉऊनच्या काळातही आपल्या जीवाची पर्वा न करता फक्त डोळ्यासमोर सामाजिक भान ठेवून रुग्णांना सेवा देणाऱया एका डॉक्टरचा कोरोनांने मृत्यू झाल्याने सर्वत्र हळहळ व्यक्त होत आहे.कोरोनांने मुंबई शहरातील तिसरा व एम पश्चिम विभागातील सिध्दार्थ कॉलनीतील एका डॉक्टरचा बळी घेतला आहे.

चेंबूर येथील सिध्दार्थ नगर परिसरातील एन. के गायकवाड मार्गावर कोरोना बाधित रुग्ण आढळत असल्याने तसेच पालिकेने कनटमेन्ट झोन घोषित केला असताना देखील लॉकडाऊनच्या काळात आपल्या जीवाची पर्वा न करता हे डॉक्टर आपल्या पत्नी सह दवाखाना सुरू ठेवून  रुग्णाची सेवा करीत होते.  गेल्या तीस वर्षा पूर्वी ते या सिध्दार्थ कॉलनी येऊन त्यांनी प्रॅक्टिसला सुरवात करून  आपल्या चांगल्या स्वभावामुळे काही दिवसात  त्यांनी कित्येक जणांना आपलेसे केले होते त्यामुळे सतत सकाळी आणि संध्याकाळी तर कधी कधी रात्री उशिरा पर्यंत रुग्ण त्याच्या कडे येत असत. त्याच्यावर हसत मुखाने त्यांची विचारपूस करीत त्यांच्यावर उपचार करीत होते.अशा संकट काळात दुसऱ्याचे प्राण वाचविणाऱ्या  डॉक्टर यांना गेल्या गुरुवारी हलकासा ताप आला. तेव्हा त्यांना जाणीव होऊ लागली की आपल्याला कोरोना लागण झाली असावी त्यांनी लगेच ही बाब आपल्या पत्नीला सांगितली आणि त्यांनी आपला दवाखाना बंद कराण्याचा निर्णय घेतला. त्यांनी दुसऱ्या दिवसापासून दवाखाना बंद केला आणि लगेच रक्त तपासणी करून घेतली तिसऱ्या दिवशी त्याची कोरोना चाचणी पॉझिटिव्ह आली. तेव्हा पासून त्यांना थकवा जाणवू लागला. त्याच्या मित्राने त्याना रुग्णालयात दाखल होण्याचा सल्ला दिला.त्यातच त्याचा ऑक्सिजन सॅच्युरेशन 88 टक्यावर असल्याने त्याची पत्नी व ते हॉस्पिटल मध्ये उपचार मिळण्या करिता धडपडत करीत होते. परंतु कोणत्याही रुग्णालयात बेड मिळाला नाही. पालिका हेल्प लाईनला संपर्क केला त्यांनी भायखळा येथील पालिकेच्या नायर रुग्णालयात बेड उपलब्ध असल्याचे सांगितले. नंतर तो ही उपलब्ध नसल्याचे सांगितल्याने शेवटी पाच तासानंतर त्याच्या  एका डॉक्टर मित्राने त्यांच्या करिता एसआरव्ही रुग्णालयात बेड उपलब्ध करून दिला.त्यांची तब्बेत बिघडत असल्याने त्यांना स्वास घेण्यास त्रास होत असल्याचे पाहून त्या रुग्णालयातील डॉक्टरानी सरळ त्यांना उपचाराकरिता आयसीयू मध्ये दाखल केले. बेड उपलब्ध होत नसल्याने,  रुग्णवहिनी मिळत नसल्याने त्यातच पाच तास वाट पाहून  उपचारा करिता रुग्णालयात दाखल झाल्यावर त्यांचा  उपचार दरम्यान मृत्यू झाला आहे.

फक्त सामाजिक जाणिवेतून आणि प्रशासनाचा भार  कमी करण्याचा उद्देशाने लॉक डाऊन व कंटेंटमेन्ट झोंन मध्ये रुग्णाची सेवा करणाऱ्या  डॉक्टरला पाच तास बेड व रुग्णवाहिका न मिळणे तसेच पालिकेने दुर्लक्ष केल्याने एका चांगल्या स्वभाव, समाजसेवक, कवी, गायक अशा हरहुन्नरी कलाकार  डॉक्टरला कोरोना मुळे बळी जावे लागल्याने सर्वत्र हळहळ व्यक्त केली जात आहे