अपहरण केलेली अल्पवयीन मुलगी सापडली अमरावतीत
- by Adarsh Maharashtra
- May 21, 2020
- 1426 views
मुलुंड :(शेखर चंद्रकांत भोसले)मुलुंडहून अकोल्याला कुटुंबासोबत पायी जाताना जळगावमध्ये अपहरण करण्यात आलेली एक अल्पवयीन मुलगी अमरावतीमध्ये सापडली असून या मुलीला अमरावती जवळील मुंबई-नागपूर महामार्गावरील लोणी टाकळीजवळ सोडून देवून आरोपीने तेथून पळ काढला आहे. ही मुलगी सध्या लोणी पोलिस ठाण्यात असून पोलिस आरोपीचा शोध घेत आहेत.
मुलुंड येथे मोलमजुरी करुन उदरनिर्वाह करणाऱ्या एका गरीब कुटुंबातील मुलीचे जळगावमध्ये अपहरण करण्यात आले होते. हे कुटुंब कधी पायी तर कधी मिळेल त्या वाहनाने अकोल्याला चालले होते. जळगावमधील नशिराबाद पोलिस ठाण्याच्या हद्दीत एका दुचाकीवाल्याने त्यांना लिफ्ट देण्याची तयारी दाखवली. दुपारची वेळ असल्याने या कुटुंबातील १५ वर्षाचा मुलगा आणि १३ वर्षीय मुलगी दुचाकीवर बसून पुढच्या प्रवासाला निघाली. काही किलोमीटर अंतर पार केल्यावर दुचाकीस्वाराने पुढे पोलिस असल्याचा बहाणा करुन उतरण्यास सांगून पोलिसांची गाडी गेल्यावर पुन्हा गाडीवर बसून जावू, आम्ही पुढे थांबतो, असे सांगितले. मुलीच्या भावाने यावर विश्वास ठेवत तो गाडीवरून उतरून पायी चालायला लागला. मात्र बरेचसे अंतर पायी गेल्यावरही आपली बहीण आणि लिफ्ट देणारा दुचाकीस्वार न दिसल्याने त्याने आपल्या आई-वडिलांना ही बाब सांगितली. आई-वडिलांनी ताबडतोब सदर दुचाकीस्वाराविरोधात नशिराबाद पोलिस ठाण्यात तक्रार केली. या तक्रारीनुसार पोलिसांनी आरोपी व लहान मुलीचा शोध घेण्यात सुरुवात केली असता काल ही मुलगी अमरावतीत सापडली. सदर दुचाकीस्वाराने तब्बल २७० किमी अंतर कापत अमरावती जवळील मुंबई-नागपूर महामार्गावरील लोणी टाकळीजवळ या मुलीला सोडून देवून तेथून पळ काढला. काल सकाळी रस्त्यावर फिरत असताना ही मुलगी पोलिसांना सापडल्याने त्यांनी तिला लोणी पोलिस ठाण्यात आणले. पोलिस आरोपीचा शोध घेत आहेत.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम