महा+रेरा मध्ये नोंदणी असलेल्या प्रकल्पांना मिळणार सहा महिन्यांची मुदतवाढ
- by Adarsh Maharashtra
- May 20, 2020
- 1003 views
मुलुंड :(शेखर चंद्रकांत भोसले) कोरोनाच्या वाढत्या प्रादुर्भावामुळे शासनाने सर्वत्र लॉकडाऊन घोषित केला असल्याने हातावर पोट असलेल्या स्थलांतरित मजुरांची भीषण अवस्था झाली आहे त्यामुळे हे मजूर आपआपल्या गावी निघाले आहेत. अश्या स्थितीत अनेक प्रकल्प ठप्प झाले आहेत त्यामुळे महारेराने आज फोर्स मेजरची घोषणा केली असून महा-रेरा अंतर्गत नोंदणी असलेल्या प्रकल्पांना मुदतवाढ मिळणार असल्याचे जाहीर केले आहे. तसेच या प्रकल्पाच्या अंतिम मुदती मध्येही वाढ करण्यात आली आहे. केंद्रीय गृहनिर्माण आणि नगर विकास विभागाने या संबंधीचा एक आदेश जारी केला असून त्याअन्वये महा-रेराने हा अध्यादेश काढला आहे.
लॉकडाऊनमुळे मोठ्या प्रमाणात स्थलांतरीत कामगार हे त्यांच्या मूळगावी गेले आहेत. तसेच काही घरी जाण्याच्या मार्गावर आहेत. त्यामुळे देशातील सर्वच भागात विविध प्रकल्पा अंतर्गत बांधकाम ठप्प झाले आहे. काही दिवसांपूर्वी केंद्रीय सल्लागार समितीची एक बैठक पार पडली. या बैठकीत केंद्राकडून रेरा नोंदणी असलेल्या रिअल इस्टेट प्रकल्पांसाठी मुदतवाढ देण्याचे निश्चित करण्यात आले. समितीने घेतलेल्या निर्णयानुसार आता रेरा नोंदणी असलेल्या प्रकल्पांसाठी आगामी सहा महिन्यांसाठी मुदतवाढ मिळणार आहे. महा-रेरा स्वतःच्या अधिकारात तीन महिन्यांची मुदतवाढ देणार आहे.
लॉकडाऊनमुळे लागू झालेला फोर्स मेजर १५ मार्चपासून आगामी सहा महिन्यां साठी लागू झालेला आहे. येत्या १४ सप्टेंबरपर्यंत हा फोर्स मेजर लागू असणार आहे. केंद्रीय सल्लागार समिती कडे मुदतवाढीसाठी अनेक पातळीवर अर्ज करण्यात आले होते. याच अर्जांवर निर्णय घेत रिअल इस्टेट प्रकल्पांअंतर्गत मुदतवाढ देण्याचा आदेश महारेराने जारी केला आहे. कोरोना सारख्या नैसर्गिक संकटामुळेच ही मुदतवाढ देण्यात येत असल्याचे केंद्रीय मंत्रालयाने देखील स्पष्ट केले आहे. तसेच महा-रेरा सारख्या नियामक आयोगांना ही मुदतवाढ तीन महिन्यांनी वाढवता येतील असेही मंत्रालयाने स्पष्ट केले आहे. महा-रेरालाही यामुळे अधिकार मिळाले आहेत. महा-रेराला सुओमोटो पद्धतीने एखाद्या प्रकल्पाला तीन महिन्यांसाठी मुदतवाढ देण्याचे अधिकार आहेत. ज्या प्रकल्पांना कोरोनाचा जास्त फटका बसला आहे अशा प्रकल्पांची मुदतवाढ ही पुढील सहा महिन्यांसाठी वाढवण्याचे अधिकार महा-रेराला देण्यात आले आहेत.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम