मंत्री आदित्य ठाकरे आणि अस्लम शेख यांनी दिली नेस्को विलगीकरणास भेट
- by Adarsh Maharashtra
- May 16, 2020
- 691 views
मुलुंड : (शेखर भोसले )मुंबईतील सर्वात मोठे प्रदर्शन केंद्र म्हणून ओळख असलेल्या गोरेगाव येथील नेस्को मैदानावरील नव्याने उभारण्यात येत असलेल्या देशातील सर्वात मोठ्या २६०० खाटांच्या कोरोना विलगीकरणास राज्याचे वस्त्रोद्योग, मत्स्यव्यवसाय, बंदरे तथा मुंबई शहरचे पालकमंत्री अस्लम शेख आणि मुंबई उपनगरचे पालकमंत्री आदित्य ठाकरे यांनी भेट देवून तेथिल व्यवस्थेची पाहणी केली व काही सूचना, मार्गदर्शन संबंधित अधिकाऱ्यांना केले.
नेस्को प्रदर्शन केंद्रामध्ये ५ मोठे प्रदर्शन सभागृह आहेत. या सर्व सभागृहांचे रूपांतर आता विलगिकरण कक्षात करण्यात येते आहे. हे संपूर्ण केंद्र एकूण २६०० खाटांच्या क्षमतेचे असणार आहे. याठिकाणी प्राणवायूची सुविधा असणार्‍या सुमारे २००० खाटा असतील. महिला व पुरुषांसाठी स्वतंत्र प्रसाधनगृहे आणि स्नानगृहे, गिझर यासह प्रत्येक बेडला स्वतंत्र पंखा दिला जाणार आहेत, अशी माहिती अस्लम शेख यांनी यावेळी दिली.
इथे ठेवण्यात येणार्‍या व्यक्ती आणि त्यांच्या नातलगांना त्रास होऊ नये म्हणून येथे विविध मदत कक्ष देखील बनवण्यात येत असून त्यात चौकशी कक्ष, निर्जंतुकीकरण कक्ष, वैद्यकीय तपासणी असे विविध कक्ष असतील तसेच येथे पुरेसे वैद्यकीय अधिकारी आणि परिचारिका नेमण्यात येणार आहेत. ३०० खाटा डायलेसिस आणि अतिदक्षता विभागासाठी राखीव ठेवण्यात येतील असे पालकमंत्री अस्लम शेख यांनी येथील सुविधांबद्दल अधिक माहिती देताना सांगितले. संपूर्ण व्यवस्थेची पाहणी केल्यानंतर या तयारीबाबत कॅबिनेट मंत्री आदित्य ठाकरे आणि अस्लम शेख यांनी समाधान व्यक्त केले.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम