मुंबई, : सायन रुग्णालयात कोरोनामुळे मृत पावलेल्या रुग्णांच्या मृतदेहाच्या शेजारीच रुग्णांना उपचारासाठी एकाच वार्डात ठेवल्याचे खळबळजनक प्रकरण नुकतेच उघडकीस आले. याप्रकरणी सायन रुग्णालयाचे अधिष्ठाता डॉ. प्रमोद इंगळे यांच्यावर ठपका ठेवत त्यांची तडकाफडकी उचलबांगडी करण्यात आली आहे. त्यांच्या जागेवर डॉ. रमेश भारमल यांची सायन रुग्णालय अधिष्ठातापदी नियुक्ती करण्यात आली आहे.

  पालिका आयुक्त प्रवीण परदेशी यांची शुक्रवारी संध्याकाळच्या सुमारास अचानक नगरविकास खात्यात बदली करण्यात आली आहे. त्यांच्या जागेवर इक्बाल चहल यांची नियुक्ती करण्यात आली आहे. त्यानंतर म्हणजे दुसऱ्याच दिवशी सायन रुग्णालयाच्या वादग्रस्त प्रकरणी अधिष्ठाता डॉ.इंगळे यांची तडकाफडकी बदली करण्यात आली आहे. यासंदर्भातील प्रशासकीय आदेश हे ५ मे रोजीचे असल्याचे कागदपत्रावर नमूद असल्याचे दिसून येत आहे. त्यामुळे नवीन आयुक्त चहल यांनी कार्यभार स्वीकारण्यापूर्वीच डॉ. इंगळे यांच्या बदलीचे आदेश देण्यात आले होते. 

 कोरोनाच्या मृतदेहांच्या बाजूलाच अन्य रुग्णांवर उपचार केले जात असल्याचा व्हिडिओ समोर आल्याने पालिका वर्तुळात मोठी खळबळ उडाली होती.या व्हिडीओमुळे महापालिका प्रशासन व रुग्णालयावर टिकेची झोड उठली. महापौर किशोरी पेडणेकर यांनी या गंभीर प्रकरणाची तत्काळ दखल या प्रकरणी चौकशी समिती नेमण्याचे आदेश दिले होते. तर रुग्णालय प्रशासनाने चौकशी समिती नेमली असून या व्हिडिओची सत्यता पडताळून दोषींवर कारवाई केली जाईल, असे रुग्णालयाकडून सांगण्यात आले होते.