नाशिक (प्रतिनिधी)-मालेगाव पाठोपाठ नाशिक शहरातही कोरोनाचा पहिला बळी गेला आहे. नाशिकच्या जिल्हा शासकीय रुग्णालयात 3 दिवसांपूर्वी एका गर्भवती महिलेचा मृत्यू झाला होता. शहरातील बजरंग वाडी येथुल आलेल्या या गर्भवती महिलेला कोरोनाची लागण झाल्याचं आज सकाळी स्पष्ट झालं असल्याने या महिलेचा मृत्यू कोरोनामुळे झाल्याचं जिल्हा शल्य चिकित्सक डॉ सुरेश जगदाळे यांनी सांगितले आहे.

दरम्यान बाळंतपनासाठी ही महिला 28 एप्रिल रोजी सिन्नरवरून नाशिकला आली होती. त्यानंतर तिला त्रास होऊ लागल्याने नातेवाईकांनी तात्काळ जिल्हा रुग्णालयात उपचारासाठी दाखल केले होते. मात्र उपचार सुरू असताना या महिलेचा 3 दिवसापूर्वी मृत्यू झाला आहे.

ही महिला 9 महिन्याची गर्भवती असल्याने तिचा घशाचा नमुना घेण्यात आला होता. आज सकाळी त्या महिलेचा अहवाल पॉजिटीव्ह आढळून आला आहे. 

पॉझिटिव्ह रुग्णाचे सिन्नर कनेक्शन? 

सिन्नरमध्येही कोरोनाचे रुग्ण असून ही महिला सुद्धा सिन्नर वरून नाशिकला आली होती.  त्यामुळे सिन्नर मधूनच ही गर्भवती महिला कोरोना बाधित असावी असा अंदाज लावला जात आहे. सिन्नरला सध्या 5 कोरोना बाधित रुग्ण आहे.

महिला नऊ महिन्याची गर्भवती असल्याने एकाच वेळी 2 जीवांचा मृत्यू झाला आहे. ही महिला शहरातील बजरंग वाडी येथे आल्यानंतर आणखीही काही ठिकाणी गेली असल्याचं समजतंय. त्यामुळे मनपा आरोग्य विभागासमोर मोठं आव्हान उभे राहिले आहे.