मुंबई: ( जीवन तांबे ) चेंबूर येथील खारदेव नगर घाटले परिसरातील झोपडपट्टीत गेल्या दोन दिवसात सहा कोरोना बाधित रुग्ण सापडल्याने खळबळ उडाली आहे. जे सहा कोरोना बाधित रुग्ण आढळले आहेत त्यामध्ये दोन पोलीस कर्मचारी, एक बँक कर्मचारी, दोन रुग्णालयातील कर्मचारी तर एक पत्रकार आहे.  बहुसंख्य झोपडपट्टी भाग असलेल्या या परिसरात कोरोनाने शिरकाव केल्याने भीतीचे वातावरण निर्माण झाले आहे. 

याच खारदेव नगर जवळील आनंद नगरात सर्वप्रथम एका तरुणीला कोरोनाची लागण झाली. ती सायन रुग्णालयातील लॅब मध्ये कामाला आहे. तिच्या कुटुंबातील पाच सदस्यांना क्वारंटाईन करण्यात आले होते.  तर त्याच ठिकाणी राहणाऱ्या एका बँक कर्मचाऱ्याला देखील कोरोनाची लागण झाली. बाजूला असलेल्या खारदेव नगरातील संत गाडगे महाराज एसआरए सोसायटीत राहणाऱ्या एका 39  वर्षीय पत्रकाराला कोरोनाची लागण झाली. तर संभाजी नगरात एका 50 वर्षीय व्यक्तीला कोरोनाची लागण झाली ते एका रुग्णालयात कामाला आहेत. घाटले गाव व खारदेव नगरात राहणाऱ्या दोन पोलिसांची कोरोना चाचणी पॉझिटिव्ह आल्याने या संपूर्ण भागातील कोरोना बाधित रुग्णाचा आकडा सहा झाला आहे.  त्यामुळे बहुसंख्य झोपडपट्टी भाग असलेल्या या परिसरात भीतीचे वातावरण पसरले आहे. येथील बहुतांशी लोक सार्वजनिक शौचालयाचा वापर करत असल्याने संसर्ग होण्याचा धोका निर्माण झाला आहे. 

 स्थानिक नगरसेवक व बेस्ट समिती अध्यक्ष अनिल पाटणकर यांनी कोरोना बाधित रुग्ण आढळल्या ठिकाणी पाहणी करून कोणत्याही स्थितीत या ठिकाणी कोरोनाचा फैलाव होणार नाही यासाठी सर्वोतोपरी उपाययोजना करण्याच्या सूचना पालिका अधिकाऱ्यांना दिल्या. तर खारदेवनगर व घाटले परिसरात अग्निशमन दलाने जंतुनाशक फवारणी केली