मुंबई :( जीवन  तांबे ) चेंबूर येथील पी.एल.लोखंडे मार्गावर आज पाच जण कोरोना बाधित आढळल्याने कोरोना बाधित रुग्णाची पस्तीशी पार झाली आहे. त्यामुळे यापरिसरात मोठ्या प्रमाणात धोका वाढला आहे. मात्र स्थानिक रहिवाशी याकडे दुर्लक्ष करून बिनधास्तपणे वावरत आहेत. कोणत्याही प्रकारचे सोशल डिस्टन्सिंग या ठिकाणी पळाले जात नाही. 

पी.एल. लोखंडे मार्गावर  50 हजारहून लोकवस्ती असून जवळपास 90 टक्के भाग झोपडपट्टीने व्यापलेला आहे. या ठिकाणच्या महात्मा फुले नगरात सुरवातीला खाजगी रुग्णालयात काम करणाऱ्या महिलेला कोरोनाची लागण झाली होती. त्यानंतर तिच्या कुटुंबियांचे देखील कोरोना चाचणी पॉझिटिव्ह आल्या होत्या. तर बाजूच्या मुकुंद नगरात एकाला लागण झाली होती. त्यानंतर या ठिकाणच्या कोरोना बाधितांचा आकडा वाढत गेला. पी. वाय. थोरात मार्गावर सिद्धार्थ रेसिडेन्सी या इमारतीत देखील कोरोना बाधित रुग्ण आढळले होते. बहुसंख्य झोपडपट्टी भाग असलेल्या पी.एल. लोखंडे मार्गावरील महात्मा फुले नगरात 3 तर मुकुंद नगरात 2  रुग्ण आज आढळल्याने  कोरोना बाधित रुग्णांच्या संख्येने पस्तीशी पार केल्याने मोठ्या प्रमाणात धोका निर्माण झाला आहे. मात्र स्थानिक रहिवाशी याकडे दुर्लक्ष करून नेहमीसारखी जीवन शैली जगत आहेत. बिनधास्तपणे रस्त्यावर घोळका करून जमा राहणे, वाहनांची वर्दळ, गर्दी करणे, तोंडाला मास्क न लावणे यासारखे प्रकार घडत आहेत. पालिका या ठिकाणी शिबीर घेत आहेत मात्र त्याला लोकांचा प्रतिसाद मिळत नाही. 

    तर लोकांचा आरोप आहे की, एम पश्चिम विभागाचे सहाय्यक आयुक्त व काही अधिकारी या ठिकाणी जाणूनबुजून दुर्लक्ष करत आहेत. पाहिजे तेवढ्या उपाययोजना करत नसल्याने रुग्ण संख्या वाढत आहेत.  प्रत्येक घरोघरी जाऊन चाचणी केली पाहिजे. पोलीस प्रशासन देखील मोकाट फिरणाऱ्यांवर कारवाई करत नसल्याने लोकांना त्यांची भीती वाटत नाही. पालिका व पोलीस या दोघांनी या ठिकाणी कडक कारवाई उपाययोजना केल्या तर कोरोनाच्या वाढत्या विळख्याला आळा घालण्यात यश येईल