मुंबई (प्रतिनिधी):   कोरोना विषाणूचा शिरकाव आता बेस्ट वसाहतीतही झाला आहे. परळ येथील बेस्ट कामगारांसाठी असलेली ही वसाहत मुंबईतील सर्वात मोठी वसाहत आहे. या वसाहतीतील एका इमारतीत राहणाऱ्याच्या नातेवाईकाला कोरोनाची लागण झाल्याची धक्कादायक माहीती समोर आली असून ती इमारत पालिकेने सील केली आहे. दरम्यान, या प्रकारानंतर आता बेस्ट उपक्रमाच्या मालकीच्या इमारतीत राहणाऱ्या कर्मचाऱ्यांचीही तपासणी करण्यात येणार आहे.  

बेस्ट उपक्रमाची परळ येथील कामगार वसाहत आहे. या वसाहतीत राहणारे  बेस्ट कर्मचारी यांची मुलगी काही दिवसांपूर्वी  घरच्यांना भेटण्यास म्हणून आली होती. त्यावेळी तिच्यात कोरोनाची लक्षणे असल्याचे समोर आले नव्हते. परंतु पुन्हा नंतर घरी गेल्यावर तिला व तिच्या नवऱ्याला त्रास होऊ लागला. त्यानंतर तपासणी केली असता दोघेही कोरोना पाॅझीटीव्ह असल्याचे समोर आले आहे. कोरोना पाॅझीटीव्ह अहवाल प्राप्त होताच इमारत सील करण्यात आली असून या इमारतीत ६० कुटुंबे राहतात. कोरोनाचा धोका टाळण्यासाठी वसाहतीतील ती इमारत सील करण्यात आली असून  इमारत जंतुनाशकाद्वारे निर्जंतुक करण्यात आली आहे. तर त्या कर्मचाऱ्यांसोबत रहात असलेल्या इमारतीतील इतर रहिवाशांना होम क्वारंटाइन करण्यात आल्याचे बेस्ट उपक्रमाच्या जनसंपर्क  विभागाकडून सांगण्यात आले. दरम्यान, परळ वसाहतीत व अन्य कोणाला ती मुलगी भेटली होती का, कोणाच्या संपर्कात आली होती का, याचा शोध पालिका आरोग्य विभागातील  कर्मचारी घेत असल्याचे आरोग्य विभागाकडून सांगण्यात आले.  

मुंबईत अधिकारी व  कर्मचाऱ्यांच्या सुमारे एक हजार वसाहती आहेत. कुलाबा, ससून डाॅक, घाटकोपर, वडाळा, कुर्ला, सांताक्रुझ, मालाड, बोरिवली आदी ठिकाणी बेस्ट कामगारांच्या वसाहती आहेत. सध्या बेस्ट उपक्रमातील  कर्मचारी अत्यावश्यक सेवा बजावत आहेत. त्यामुळे त्यांच्या जीवाला कुठलाही धोका होऊ नये, यासाठी सगळ्याच वसाहतीतील  कामगारांच्या आरोग्याची तपासणी करण्यात येणार आहे. दरम्यान, कोरोना विषाणूने डोकेवर काढले त्याच वेळेपासून कर्मचाऱ्यांमध्ये काळजी घेण्याबाबत मेसेज, व्हाटॅअप आदी माध्यमातून जनजागृती करण्यात येत असल्याचे जनसंपर्क अधिकारी मनोज वराडे यांनी सांगितले.